کوئٹہ۔ 01 دسمبر(اے پی پی) پاکستان پیپلزپارٹی نا چیئرمین بلاول بھٹو زرداری پارینے کہ داسہ وخت بسنے کہ پاکستان اٹ خار، انتقامی کارروائی تا سیاست ءِ ہمیشہ کن دفن کروئی مریک، ننے ملک اٹی رہینگوک آ الس نا فائدہ غاتا خیال ءِ تخوئی ءِ، نن پاکستان ءِ ہندن ءُ ماڈل ملک اس جوڑ کننگ خوانہ ہرانا شاریک دنیا نا پین ملک اسے آ کار تو تینا ملک آ گمرکیر۔ داخیال آتا درشانی ءِ او بلوچستان ہائی کورٹ اٹی پیپلز لائر فورم و بلوچستان بار انا کنڈآن اڈہلوک پروگرام اٹی دود آن تران کرسا کرے۔ بلاول بھٹو زرداری نا پاننگ ئس کہ کنے بلوچستان نا الس نا ڈکھیاتا احساس ارے، فروری ٹی گچین کاریک مننگ والاءُ، ای خواوہ کہ متکن آ وڑآ حکمرانی کروک آتے 8 فروری آ نم غٹ اسہ کلہو اس ایتبو، 70 سال آن ملک اٹی ہرانظام چلینگسا بننگ ءِ اوڑآن انت الس ءِ فائدہ اس رسینگانے، پاکستان ناسیاست آن خار، انتقامی کارروائی نا سیاست ءِ چٹفوئی مریک، المی ءِ متکن آ سیاست روایتی سوچ ءِ ہلنگے۔ اوپارے کہ بلوچستان نا بارواٹی پاننگک کہ معدنیات و وسیلہ غاتیٹی مچ آپاکستان آ زیات ءِ، بلوچستان نا معدنیات آ صوبہ نا الس نا حق و حاکمیت ءِ امنا کننگے، سی پیک نا مسخت بلوچستان نا الس ءِ شونداری تننگ ءِ، صوبہ نا الس تون ناانصافی ءِ اسُل سگنگ پننگک۔ اوپارے کہ آئین اٹ پیدوار ءِ کہ ہراکان وسیلہ پیش تمک غٹ آن مست ہمووسیلہ غاتیا ہندی مخلوق نا حق ءِ، و غٹ آن مست ہندی مخلوق ءِ فائدہ بایدے ملے۔ سندھ حکومت تھرپارکراٹی پرائیویٹ پارٹنر شپ نا کمک اٹ پیش تموک آ معدنیات ہندی مخلوق ءِ حصہ دار کرے و تھر آن ودی مروک آ بجلی ءِ فیصل آباد اسکان سرکرے۔
