کوئٹہ۔ 30 نومبر (اے پی پی) بلوچستان ایڈز کنٹرول پروگرام نا صوبائی منیجر ڈاکٹر خالد الرحمان قمبرانی پارینے کہ بلوچستان اٹی برجاسال ایڈز انا ناجوڑآتا کچ 2016 آن ودسا 2358 مسنے ، ایڈ ز انا ناجوڑآتیٹی ودکی گڑتی نا ہیت اسے، صوبہ نا 6 ضلع غاتے ایڈز انا بابت ہائی رسک گوندنگانے ایڈز انا مرض آن بچفنگ نا بابت الس اٹ شعور و آگاہی ودی کننگ کن چندی پروگرام اڈتننگ انگ ءِ۔ داہیت ءِ او پنچ شنبے نادے آ ایڈیشنل ڈائریکٹر جنرل ہیلتھ سروس بلوچستان ڈاکٹر شوکت علی، ڈپٹی منیجر بلوچستان ایڈز کنٹرول پروگرام ڈاکٹر داؤد خان اچکزئی ، ڈاکٹر تاج محمد کھوسہ و ایلوفتے تون اوار کوئٹہ پریس کلب اٹی پریس کانفرنس کرساپارے۔ ڈاکٹر خالد الرحمان قمبرانی پارے کہ مچ آ دنیا ٹی یکم دسمبر ءِ ہرسال ایڈز انا جہانی دے انا وڑاٹ اڈتننگک دادے ءِ اڈتننگ نا مسخت ایڈز انا دین انا بارواٹی آگاہی ودی کننگ ءِ و داہموفتا یات اٹی داد ے ءِ اڈتننگک ہرا ایڈز انا سوب آن کزیتکرینو، ریڈربن جہانی کہول آ ہمومخلوق تون یکجہتی نا درشانی نا نا نشانی ءِ ہرا ایڈز اٹی اختہ مسنو۔ اوپارے کہ جہانی کہول آ ہرسال ایڈز ڈے اکن اسہ تھیم اس تخنگک داسال 2023 نا تھیم کیمیونٹیز لیڈ کیک۔ اوپارے کہ ایڈز اسہ لاعلاج و جان لیوامرض اسے ایڈز انا دین ءِ ایچ آئی وی یعنی انسانی جون اٹی قوت مدافعت اٹی کمتی ءِ پاننگک ایچ آئی وی اسہ ہندن ءُ دین اسے ہراڑان ایڈز انا ناجوڑی لگنگ کیک۔ دا دین منہ وخت آن پد جون نا مدافعتی نظام ءِ بھس کرینے دفاعی نظام نا مفلوج مننگ نا دروشم اٹ ہراکہ ناجوڑی انسان نا جون اٹی پترینگک او سنگین و مہلک دروشم اس اختیار کیک و مرک ہی اونا انجام مریک۔ اوپارے کہ ایچ آئی وی انسان نا جون اٹی مسہ وڑاٹ پترینگ انگ کیک اول داکہ دترنا کمک اٹ داپترینگک ہراٹی غیرمحفوظ انتقال خون، ایچ آئی وی آن زہمی بندغ نا زیر استعمال سرنچ آن ، ازباب جراحی، حجام نا کاریم اٹ اتوک آ ازباب، خف بامس اٹی ءِ ٹُنگ کننگ کن استعمال اٹی بروک آ ازباب آن و ہندا وڑ دندان ءِ کشفنگ نا وخت آ کاریم اٹ اتوک آ ازباب آن مریک۔ و ارٹ میکو وڑ زہمی لمہ غان ودی مروک آ چناٹی داپترینگک وخت اس کہ مسٹ میکو ذریعہ ایچ آئی وی نا زہمی بندغ اسے آن غیرمحفوظ جنسی تعلقداری رواتخنگ آن مریک دا دین انا انسانی جون اٹ پترینگ ا نگ نا پین وڑہم ارے ہرانا رداٹ پاکستان و ولدا بلوچستان اٹی انجکشن نا کمک اٹ نشہ ہلوک آ نشہ نا عادتی بندغ آتیٹی ایچ آئی وی نا دین زدہ بندغ آتا کچ زیات ءِ و ارٹ میکو بھلا ذریعہ نرینہ نا نرینہ تون جنسی تعلقداری ہرافتے ٹی خواجہ سراہم اوار ءِ وخت اس کہ مسٹ میکو بھلا ذریعہ زہمی خاہوت تون جنسی رابطہ تخنگ داڑآن ہم دادین جون اٹ منتقل مننگ کیک ، بدبختی اٹ بلوچستان و خاص وڑاٹ کوئٹہ ٹی انجکشن نا کمک اٹ نشہ ہلوک آ بندغ آتا کچ ودسا ہِننگ ءِ و رنا تا بھلو کچ اس داٹی اختہ مننگ ءِ ، داسال بلوچستان ایڈز کنٹرول پروگرام نا کنڈآن کروک آ ٹیسٹ آتا نتیجہ ٹی بلوچستان اٹی ایڈز اٹی اختہ 2358 مریض مون آ بسنے، وخت اس کہ تدوک آ سال دا کچ 2016ئس برجاسال کوئٹہ ٹی رجسٹرڈ مریض تا کچ 1937 وتربت اٹی 339 ءِ۔
