اسلام آباد۔ 30 نومبر (اے پی پی) قطراٹی کاریم کروک آ پاکستانی تا زرراہی تس اٹی اکتوبر اٹی ماہانہ بنداوتیا ودکی ریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ اکتوبر اٹی قطر اٹی کاریم کروک آ پاکستانیک 75.8 ملین ڈالرنا زرمبادلہ ملک آ مون تسر ہرا ستمبر نا مقابلہ ٹی 7 درسد زیات ءُ، ستمبر اٹی قطر اٹی کاریم کروک آ پاکستانیک 70.8 ملین ڈالر نا زرمبادلہ ملک آ مون تسوسر۔ تدوک آ سال اکتوبر اٹی قطر آن زرراہی تس نا کچ 77.9 ملین ڈالر ریکارڈ کننگاسس۔ حساب وکتاب نا رداٹ برجامالی سال نا اولیکو چار تُو اٹی قطر اٹی کاریم کروک آپاکستانی تا زرراہی تس نا کچ 284 ملین ڈالر ریکارڈ کننگانے ہرا تدوک آ مالی سال انا ہندا مد انا مقابلہ ٹی 13.2 درسد کم ءُ، تدوک آ مالی سال انا ہندا مد اٹی قطر اٹی کاریم کروک آپاکستانیک 327.2 ملین ڈالر نا زرمبادلہ ملک آ مون تسوسر ۔ یات سلے کہ برجامالی سال انا اولیکو چار تُو اٹی سمندر پار پاکستانی تا جم زرراہی تس نا کچ 8.794 ارب ڈالر ریکارڈ کننگانے۔
