کوئٹہ۔ 30 نومبر (اے پی پی) پاکستان پیپلزپارٹی نا سینٹرل ایگزیکٹیو کمیٹی نا باسک مسکوہی صوبائی وزیر مواصلات میر صادق عمرانی پارینے کہ شہید بینظیر بھٹو نا شہیدی آن پد آصف علی زرداری نرزوری اٹ زندان نا سختی تے برداشت کرے۔ آصف علی زرداری ، بلاول بھٹو زرداری و پارٹی نا ایلو سرکڑدہ غاک الس نا نیام اٹ کوئٹہ نا یخ انا موسم اٹ تولسا کارندہ غاتا حوصلہ ءِ ودفینو۔ داخیال آتا درشانی ءِ او پنچ شنبے نادے آ ایوب اسٹیڈیم اٹی پاکستان پیپلزپارٹی بلوچستان نا کنڈآن 56 می یوم تاسیس نا رداٹ اڈ ہلوک لس جلسہ غان تران کرسا کرے۔ میر صادق عمرانی پارےکہ پاکستان پیپلزپارٹی نا سرکڑدہ غاک جمہوری جہد و بالغ رائے دہی نا بنداو آ بلوچستان نا الس ءِ وونٹ انا حق تسر داکان مست وونٹ انا جاگہ غا سبی نا شاہی جرگہ ٹی فیصلہ غاک مسرہ، اوپارےکہ زندان اٹ بیدادی آن پد ہم آصف علی زرداری تینا موقف آن پدی متو، داسہ بلاول بھٹو زرداری، شہہید ذوالفقار علی بھٹو، شہید گودی بینظیر بھٹو نا تاریخ ساز جہد ءِ مون آدرسا استقامت اتون جمہوری جہد کننگ ءِ۔ اوپارےکہ پاکستان پیپلزپارٹی اینو 56 می یوم تاسیس ءِ کوئٹہ ٹی اڈتننگ ءِ، یوم تاسیس نا وخت آ آصف علی زرداری بلوچستان نا کونہ کونہ غا پارٹی کارندہ و مچ آ ملک آن پارٹی راہشون آتے کوئٹہ نا مش تادامن اٹ مچ کرسا کلہو تسنے کہ الس نا حق انا جہد پین ترند مریک۔
