کوئٹہ۔ 30 نومبر (اے پی پی) نگراں وزیراعلیٰ بلوچستان میر علی مردان خان ڈومکی تون پنچ شنبے نادے آ داڑے وزیراعلیٰ سیکرٹریٹ اٹی تھائی لینڈ نا کراچی ٹی متعین قونصل جنرل ناروت سونتا روڈوم (Naruts Soontarodom)نا کماشی ٹی نمائندہ ڈل اوڑدہی کرے و تین پہ تینی است خواہی نا امور تیا گپ وتران کرے ، ڈل تھائی لینڈ نا مسہ بھلا جامعہ غاتیٹی بلوچستان نا طالب علم آتیکن اسکالر شپ، بلوچستان نا جامعہ گاتا خوانفوک آ اسٹاف نا کسبی کاریم نا کچ اٹی ودکی و یوتھ ایکسچینج پروگرام تون اوار واپاری و چندی تین پہ تینی است خواہی نا امور آ گپ وتران کرے وخت اس کہ سی پیک ڈٹ آتیٹی زرکاری نا است خواہی نا درشانی ءِ کرسا ہڑتوم آ ملک آتا نیام اٹ دیرپاتعلقداری تا مون آ دننگ نا عزم ءِ کرے۔ ڈل اتون گپ وتران کرسا نگراں وزیراعلیٰ بلوچستان میر علی مردان خان ڈومکی پارےکہ بلوچستان مہمانداری و روایت آتا امین صوبہ ءِ ، تھائی لینڈ اٹی بلوچستان نا ورناتے گچین تعلیمی وارخواہی تا فراوانی و جامعہ غاتا تدریسی اسٹاف نا تھائی لینڈ دورہ و کسبی تربیت نا پڑو ستاکڑزک۔ دارداٹ تھائی لینڈ و پاکستان نا نیام اٹ یوتھ اینڈ اسٹوڈنٹس ایکسچینج پروگرام ءِ فعال کننگ تون اوار اوار پاکستان و تھائی لینڈ نا نیام اٹ واپاری و تعلیمی بشخ آتون اوار چندی سیکٹرآتیٹی تین پہ تینی کمکاری ءِ مون آ دننگک، سی پیک ڈٹ آتیٹی تھائی لینڈ نا اوار مننگ نا است خواہی ستاکڑزک، نگران وزیر اعلیٰ بلوچستان ڈل ءِ باور کرفے کہ تھائی لینڈ و پاکستان نا نیام اٹ زیر التواء واپاری امور نا ایسری کن بنجائی حکومت تون ہیت کننگک و دہ سال آن زیر التواء فری ٹریڈ نا ایسر نا چاری باندات آتے مثبت وڑاٹ ایسر کننگ و بھرمی جوڑ کننگ نا ہرممکن کوشست کننگک۔ میر علی مردان خان ڈومکی پارے کہ بلوچستان اٹی گوازی تا مون آ دننگ کن نوابزادہ جمال خان رئیسانی نا کماشی ٹی محکمہ گوازی فعال کڑد ادا کننگ اٹی ءِ و ورناتا لائخی تے تالان کرسا اوفتے جان جوڑ چاگڑد اسے نا فراوانی کن گام گیج برجاءِ داوخت آ نگران وزیراعلیٰ بلوچستان میر علی مردان خان ڈومکی و تھائی لینڈ نا قونصل جنرل ناروت سونتا روڈوم نا نیام اٹ سوئینر نا تبادلہ ہم کننگا وخت ا س کہ نگراں وزیراعلیٰ نا کنڈآن ڈل انا بشخ ہلوک آتے ٹیکی و روایتی شال ہم پیش کننگا۔
