اسلام آباد۔ 30 نومبر (اے پی پی) نگران بنجائی وزیرحوالکاری، شینکاری و پارلیمانی امور مرتضیٰ سولنگی ریاستی براڈ کاسٹرآتیٹی اصلاحات نا گرج آ زور شاغساپارینے کہ ساڑی آدور ٹیکنالوجی ناءِ، ننا ریاستی براڈ کاسٹرآتیٹی حالیت آتے گچین کننگ نا گرج ءِ، نن الیکشن نا کنڈآ ہِننگ اٹی اُن، قائمہ کمیٹی حوالکاری ٹی سیاسی جماعت آتا نمائندگی ساڑی ءِ، کنا خواست ءِ کہ ریاستی میڈیا ٹی اصلاحات نا پروگرام آ شرہ کننگے۔ داہیت ءِ او پنچ شنبے نادے آ سینیٹر فوزیہ ارشد نا کماشی ٹی سینیٹ نا قائمہ کمیٹی حوالکاری و شینکاری نا دیوان اٹی گپ وتران کرسا پارے۔ دیوان پارلیمنٹ ہاؤس نا کمیٹی روم نمبر اسٹ اٹی اڈہلک۔ دیوان اٹی 9 اکتوبر 2023 آ کمیٹی نا دیوان اٹی کروک آسلاہ و سوج خاص وڑاٹ 53 یومیہ اجرت آ بھرتی مروک آملازم آتا بابت سلاہ و سوج آتیا عملدرآمد نا جاچ ءِ ہلنگا۔ نگران بنجائی وزیر حوالکاری پارے کہ نگران حکومت ہچ ءُ آخبتی تعیناتی اس کننگ کپک، نگران حکومت داہم کننگ کپک کہ ادارہ اس بند مرے۔ اوپارے کہ اسٹاف نا کمتی ءِ مرکننگ یا المی پروگرام چلیفنگ کن وقتا فوقتا گڑاس مخلوق نا خذمت ءِ دوئی کروئی تمک، یومیہ اجرت آ بھرتی کن اشتہار نا پراسیس مرغن مریک، داوڑادارہ غاک کاریم کننگ کپسہ۔ اوپارے کہ اگہ کمیٹی سلاہ کیک کہ ڈیلی ویجز کن اشتہار نا شڑت المی ءِ تو کمیٹی نا سلاہ وفیصلہ آ عمل کینہ۔ اوپارے کہ کمیٹی یومیہ اجرت آ بھرتی کن اشتہار تننگ یا وڑاسے نا بھرتی کننگ یا کپننگ نا بابت پیدوار پارت ایتے، نن عمل کینہ۔
