کویت۔29نومبر (اے پی پی):پاکستان ءُ کویت ءَ وردن ءُ وراک ءِ رکھینگ، توان، معدنیات ءَ ھوار جتا جتائیں شوبگ آنی تہ ءَ اربانی ڈالر ءِ سرمایہ کاری ءِ 7 منوگری ءُ 3 تپاک نامہ آنی سر ءَ دست چنگل جتگ۔ چار شمبے ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ ادارکی مزن وزیر انوار الحق کاکڑ ءَ کویت ءِ فرسٹ ڈپٹی مزن وزیر ءُ وزیر ءِ تہی کار شیخ طلال الخالد الاحمد الصباح ءَ گوں گند ءُ نند کت۔ گند ءُ نند ءِ ساھت ءَ آرمی چیف جنرل سید عاصم منیر ھم ساڑی ات۔ دوئیں سروک آں دوئیں ملک آنی نیام ءَ تاریخی براتی ءُ یکوئی آنی ارزشت ءِ سر ءَ زور پر دسات ءُ براتی ءُ یکوئی آناں وت مہ وتی رد ءَ سیت مند یں اقتصادی شریکداری ءَ مٹ کنان ءَ گیش مھکم جوڑ کنگ ءِ واھشت ءِ درشان کت۔ دوئیں سروک آں دوئیں ملک آنی نیام ءَ 7 منوگری ءُ 3 تپاک نامہ آنی سر ءَ یاتگیری مراگش ءَ بھر زوری کت۔ ریاست کویت ءِ نیمگ ءَ چہ پاکستان ءِ جتا جتائیں شوبگ آں ھوار فوڈ سیکورٹی ، کشت ءُ کشار، توان، ورگی ساپیں آپ ءِ پجاری ءُ اشکر ءِ چات ءَ کار کنگ ءِ چست ءُایر آنی تہ ءَ کمک ءِ واستہ اشکر ءِ چات ءَ کار کنگ ءِ فنڈ ءِ برجا کتگ، ٹیکنالوجی زون ڈویلپمنٹ ءُ مینگروو ءِ رکھینگ ءَ ھوار اربانی ڈالر ءِ سرمایہ کاری ءِ 7 منوگری ءُ دود ءُ ربیدگ ءُ آرٹ، ماحولیات ءُ مھکمیں دیمروئی ءِ شوبگ ءَ کمک ءِ واستہ 3 تپاک نامہ آنی سر ءَ دست چنگل جنگ بوت۔ مزن وزیر ءَ کویت ءِ گوما اے منوگری آناں کامیاتی ءِ بنجاہ نامینت ایش ھاسیں سرمایہ کاری آسراتی کونسل ( ایس آئی ایف سی) ءِ پلیٹ فارم ءَ گوں ملک ءِ واستہ دیم ءَ سہرا بوھگ ءَ انت۔ مزن وزیر ءَ کویت ءِ امیر شیخ نواف الاحمد الجابر الصباح ءِ جان سلامتی ءِ واستہ ھم دعا ءِ نیک کت۔
