اسلام آباد۔ 29 نومبر (اے پی پی) صدر مملکت ڈاکٹر عارف علوی بینک فراڈآن زہمی شاری اسے 344،600روپئی پدی تننگ ناپارت کرے۔ دا بابت او بینکنگ محتسب نا پرمان ءِ برقرار تخسا الائیڈ بینک انا اپیل ءِ مستر دکرینے۔ چارشنبے نادے آایوان صدر نا پریس ونگ آن جاری بیان نا رداٹ صدر مملکت پارے کہ الائیڈ بینک اناصارف نا اکاؤنٹ آن 344،602روپئی درواٹ کشنگا، بینک صارف نا رضامندی آن بیدس فنڈ منتقلی سہولت ءِ ملسا بدانتظامی نا ارتکاب کرے۔ صدر مملکت پارے کہ بے موکل آن آن لائن فنڈ ٹرانسفر آسراتی ءِ ملنگ نا سوب آن صارف آتے نسخان ہرفوئی تما۔ صدر مملکت بینکنگ محتسب نا فیصلہ نا برخلاف الائیڈ بینک انا دائرکروک درخواست آ فیصلہ ءِ بنفساپارے کہ بینک کانودی زمواری ادا کننگ اٹ بے سہب مس، بیدس موکل آن انٹرنیٹ بینکنگ چینل ملنگ بے ڈولی و عدم تعمیل نا ارتکاب کرے۔ اوپارے کہ غاو کروک آ ءِ بینک ہیلپ لائن تون ملوک نمبر اسے آن فون کال بس و کال آن پد اکاؤنٹ آن 344،602 روپئی نا زر ءِ منتقل کننگا۔ ڈاکٹر عارف علوی پارے کہ صارف مستین اٹ آن لائن چینل آتا کمک اٹ ہچ ءُ لین دین اس کتنے۔ سرجم حوال آتا رداٹ امیر علی وسان فراڈ آن دمدستی پد غاو درج کرفے ولے غاو ایسر متو ہراڑآ صارف ہنوک آ زر انا واپسی کن بینکنگ محتسب تون رجوع کرے۔ محتسب بینک ءِ زر پدی تننگ نا پارت کرے ولے بینک فیصلہ نا برخلاف صدر ءِ اپیل دائرکرے۔ صدر مملکت کیس اناذاتی وڑاٹ سماعت کرے و بینک انااپیل ءِ مسترد کرے۔ صدر مملکت پارےکہ بینک ادائیگی نا نظام و الیکٹرانک فنڈ ٹرانسفر ایکٹ 2007 نا سیکشن 41 نا رداٹ متنازعہ لین دین نا کانودی حیثیت ثابت کننگ اٹ بے سہب مس۔ زر انا قسط آتیٹی گدریفنگ اسہ ہی تاریخ آ بھاز چنکو وخت اسے ٹی اسہ ہی وڑآ کننگا۔ اوپارے کہ زر انا گدریفنگ آ بینک سسٹم الرٹ بایدے مروسس۔ کم از کم صار فءِ کال ہنوسس۔ صدر مملکت پارے کہ دا گڑتی آ ہیت آ بینک و سٹیٹ بینک چکار تخر، شار ی ڈیجیٹل بینکنگ، پوسکن آ ٹیکنالوجی آ تالان بینکنگ مصنوعات آتیان واقف اف۔ صدر پارے کہ بینک آن لائن چینل آتا بابت کانود و سٹیٹ بینک انا پارت آتا تعمیل کننگ اٹ بے سہب مسنے۔ صدر مملکت بینک انا اپیل ءِ مسترد کرسا پارت کرے کہ 30 دے انا تہہ ٹی بینکنگ محتسب ءِ تعمیل نا رپورٹ اس جمع کرفے۔
