برسلز۔ 29 نومبر (اے پی پی) نگران وزیرخارجہ جلیل عباس جیلانی بیلجیئم نا دارالحکومت برسلز اٹی پاکستان بیلجیئم پارلیمانی فرینڈ شپ گروپ نا چیئرپرسن سینیٹر ایلیسیاکلیس و یورپی پارلیمنٹ نا باسک آتون اوڑدہی کرے۔ بیلجیئم اٹی پاکستانی سفارت خانہ غان جاری بیان نا رداٹ اوڑدہی ٹی یورپی پارلیمنٹ نا باسک راسا جکنیوسین، فوبیو ماسیموکاسٹالڈو، آنگاھاگا، برن ہارڈزیمنیوک ، تھامس زیچووسکی، و ھروجاون ئسک ساڑی ئسر۔ داوخت آ وزیرخارجہ جلیل عباس جیلانی پارے کہ پاکستان یورپی یونین تون ہڑتوم آ کنڈآتا کثیرالجہتی تعلقداری تے خاص اہمیت ایتک۔ او پارلیمنٹ نا باسک آتے اہم علاقائی و جہانی امور آ پاکستان نا موقف آن معلومدار کرے۔ نگران وزیرخارجہ پارے کہ جہانی برادری بھارت نا کنڈآن کودک کشمیری تیا برجاظلم انا چرجوئی ءِ بند کرفنگ کن زور شاغے۔ اوپارے کہ بھارت نا غیرکانودی کوزہ ٹی جموں وکشمیر اٹی برجاآجوئی درشانی نا پابندی و انسانی حق انا بھلا خلاف ورزی تا چٹفنگ کن جہانی برادری و انسانی حق انا جہانی تنظیم آتون کمکاری نا خواہندار ءِ، پاکستان اقوام متحدہ نا سلامتی کونسل نا قراردادآتارداٹ کودک کشمیری تے اوفتا روا، حق خودارادیت ترفنگ کن تینا اخلاقی، سیاسی و سفارتی کمکاری ءِ برجاتخک۔ وزیرخارجہ پاکستان بیلجیئم پارلیمانی فرینڈ شپ گروپ نا چیئرپرسن، سینیٹر ایلیسیاکلیس تون ہم اوڑدہی کرے و زرگزران ، واپار، زرکاری، تعلیم ، دودوربیدہ و سیل وسوات تون اوار تین پہ تینی است خواہی نا چندی بشخ آتیٹی ہڑتوم آ کنڈآتا کمکاری نا مون آ دننگ نا بابت گپ وتران کرے۔ داوخت آیورپی یونین، بیلجیئم و لکسمبرگ کن پاکستان نا سفیر آمنہ بلوچ ہم وزیرخارجہ تون ساڑی ئسک۔
