اسلام آباد ۔ 29 نومبر (اے پی پی) اسپیکر قومی اسمبلی راجہ پرویز اشرف پارینے کہ وخت انا خواست ءِ کہ است انا حب اٹ فلسطینی الس تون یکجہتی نا درشانی ءِ کے۔ چارشنبے نادے آ فلسطین تون یکجہتی نا جہادے انا وخت آ تینا کلہواٹی اوپارے کہ پاکستانی الس و پارلیمان تینا فلسطینی ایلم تتون پورو یکجہتی نا درشانی ءِ کیرہ۔ اوپارے کہ اسرائیلی کوزہ گر فوج انا کنڈآن فلسطینی چنا، زالبول و کودک شاری تا کشت وخون شرمناک و مذمت نا قابل ءِ۔ دنیا ٹی پائیدار امن کن کشمیر و فلسطین نا ویل اتون اوار غٹ جھیڑہ غاتا انصاف اٹ ایسر المی ءِ۔ فلسطین اٹ برجا نسل کشی و جبری ہمپنگ ءِ توننگ کن عملی گام گیج کننگ نا گرج ءِ۔ فلسطین نا ساڑی حالیت آتیا جہانی برادری نا چپی لمحہ فکریہ سے، فلسطین نا ویل اناایسری 1967آن مست انا سیم تا رداٹ آزاد فلسطینی ریاست نا قیام و القدس الشریف ءِ اونا دارالحکومت گوندنگ اٹ تخوک ءِ۔ اقوام متحدہ فلسطین اٹ انسانی حق انا لتاڑتا چٹفنگ کن کڑد ادا کے۔ اسپیکر پارے کہ اسرائیلی ظلم فلسطینی الس نا حق خودارادیت ناتحرک ءِ توننگ کپک۔ اسپیکر فلسطینی الس نا سیاسی، سفارتی و اخلاقی مخ تفی ءِ برجاتخنگ نا پاکستان نا اصولی موقف نا درشانی ءِ کرے۔
