کوئٹہ۔ 29 نومبر (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر اسہ خصوصی بیان اسے ٹی پارینے کہ فلسطین اسرائیل جھیڑہ نا بابت چینی وزیرخارجہ اقوام متحدہ نا سلامتی کونسل نا اسہ اہم ءُ دیوان اسے نا کماشی ءِ کیک ، سی پی سی نا مرکزی کمیٹی ناسیاسی بیورو نا باسک و وزیرخارجہ وانگ ای سلامتی کونسل نا دیوان نا کماشی کن نیویارک آ کاہک۔ اوپارے کہ چین ءِ اومیت ءِ کہ فلسطین نا ویل اسرائیل آ سلامتی کونسل نا بڑزکوکہولی دیوان اس بٹنگ آن چندی فریق آتا نیام اٹ گپ وتران ءِ مون آدننگ ملک، و دا باندات آ امنائی سلاہ ودی مریک، ہراڑآن غزہ ٹی انسانی تنکی ءِ چٹفنگ، آخبت جنگ بندی کننگ و لس شاری تا رکھ اتون بالآخر اِرا ریاستی فارمولانا کمک اٹ فلسطین نا ویل اناجوان، انصاف اٹ و دیرپاایسری نا مون آ دننگ اٹ کمک رسینگک۔ اوپارے کہ جہانی برادری ءِ ساڑی آ فلسطین اسرائیل جھیڑہ ءِ دمدستی وڑاٹ ایسر کروئی مریک، جنگ انا حالیت اٹ علاقہ ٹی بھلو کچ اسے آ بھسکاری تالان مریک۔ داتم اسکان نا جنگ اٹی 15 ہزار آن زیات انسان زوال کرینو، 35 ہزار آن زیات ٹھپی مسنو، ہرافتیان 10ہزار آن زیات معذور مسنو۔ عارضی جنگ بندی آن فائدہ ہرفسا چینی وزیرخارجہ امن کن بے کچ اہم بریک تھرو اس تننگ کیک ، چیئرمین قائمہ کمیٹی مستی پارے کہ چین انا جہانی سیاست نا بابت مسلمہ اہمیت ءِ ۔ چین تینا طرز سیاست و طرز سفارت اٹ دا ویل انا دیرپا ایسر اس پٹنگ کن قابل عمل سلاہ تننگ کیک، تدوک آ دے تیٹی عرب ملک آتا وزیرخارجہ غاتا ڈل چینی وزیرخارجہ تون اوڑدہی کن بیجنگ آ رسینگار و دابڑزکو کہولی میٹنگ آن پد وزیرخارجہ غاک روسی وزیرخارجہ تون ماسکوٹی اوڑدہی کریر ، اومیت کننگ انگ ءِ کہ چین، قطر، مصر، سعودی عرب نا سفارتی و سیاسی کوشست آتیٹی اومیت کننگ انگ ءِ کہ فلسطین اسرائیل جنگ ءِ چٹفنگ اٹ سرسہبی مریک۔
