کوئٹہ۔ 28 نومبر (اے پی پی) نگران وزیراعلیٰ بلوچستان میر علی مردان خان ڈومکی سے شنبے نادے آ شیخ خلیفہ بن زید میڈیکل کمپلیکس سریاب روڈ کوئٹہ نا دورہ ءِ کرے و چندی بشخ آتا معائنہ ءِ کرے۔ نگران وزیراعلیٰ ہسپتال اٹی ہاسپٹل مینجمنٹ انفارمیشن سسٹم نا بناءِ ہم کرے ۔ داوخت آ تران کرسا نگران وزیراعلیٰ بلوچستان میر علی مردان خان ڈومکی پارے کہ صوبہ ٹی الس ءِ سرکاری کہول آ درمان نا گچین و آب اٹ آسراتی تا فراوانی کن ہرسال اسہ بھلو زر اس جتا کننگک گرج داہیت انا ءِ کہ جتا کروک وسیلہ غاتا سہی کاریم اٹ اتنگ ءِ پک کننگے تانکہ سرکاری کہول آ جان جوڑی نا آب اٹ آسراتی ہر بندغ نا دسترس اٹی مرے۔ اوپارے کہ ٹرشری کیئر ہسپتال آتا پورو فعالیت المی ءِ تانکہ بلوچستان نا الس ءِ درمان کن ایلو صوبہ غاتا رخ ءِ کروئی تمپ۔ نگران وزیراعلیٰ پارے کہ شیخ خلیفہ بن زید میڈیکل کمپلیکس اٹی ایچ ایم آئی ایس نا فعالیت آن ہسپتال آ بروک آ غٹ مریض آتا ڈیٹا رکھ مریک و سینٹرل ڈیٹابیس تون منسلکی نا سوب آن مریض آتے غٹ بشخ آتیٹی طبی کمکاری باآسانی میسر بننگ کیک۔ داڑتون اوار اوار پوسٹ گریجویٹ مینجمنٹ انسٹی ٹیوٹ نا فعالیت آن ہسپتال نا طبی سروس آتیٹی پین گچین بریک۔ شیخ خلیفہ بن زید میڈیکل کمپلیکس نا دورہ نا وخت آ نگران وزیراعلیٰ بلوچستان ءِ حوال ترسا سیکرٹری جان جوڑی عبداللہ خان پارے کہ صوبہ نا غٹ ضلع غاتیٹی دوائی تا سپلائی برجاءِ شیخ خلیفہ بن زید میڈیکل کمپلیکس اٹی 2018 آن پدتمنگ نا گواچی ا یچ ایم آئی ایس ڈٹ اسہ ہفتہ ٹی پورو کننگانے و ننا کوشست ءِ کہ محکمہ جان جوڑی ٹی پدسلوک غٹ ڈٹ آتے پورو کرسا درمان نا گچین آسراتی تے پک کننگے۔ داوخت آ شیخ خلیفہ بن زید میڈیکل کمپلیکس نا ایگزیکٹیو ڈائریکٹر ڈاکٹر ذوالفقار علی پارے کہ 250 کٹ انا دا ہسپتال اٹی پوسکن آ طبی مشینری و درمان نا آب اٹ آسراتی دوئی ءِ و سروسز نا گچینی کن گام گیج ہم برجاءِ۔ داوخت آ نگران وزیراعلیٰ بلوچستان میر علی مردان خان ڈومکی ہاسپٹل مینجمنٹ انفارمیشن سسٹم نا پورو و چندی بشخ آتیٹی نمان طبی خذمت سرتروک آ ڈاکٹر و ہیلتھ کیئر اسٹاف ءِ شیلڈز تس۔
