اسلام آباد۔ 27 نومبر (اے پی پی) متحدہ عرب امارات اٹی پاکستان نا سفیر فیصل نیاز ترمذی دوشنبے نادے آ نگران وزیراعظم انوارالحق کاکڑ نا متحدہ عرب امارات (یواے ای ) نا دورہ نا ستاءِ کرسا پارے کہ ہڑتوم آ ملک آک تینا گچین آخبت کن سٹریٹجک کمکاری و اقتصادی ، واپاری و شونداری انضمام ءِ ودفنگ نا خواہہندار ءُ۔ اوپی ٹی وی نیوزچینل تون گپ وتران کرسا پارےکہ وزیراعظم انوارالحق کاکڑ نا متحدہ عرب امارات نا دورہ ٹی خاص وڑاٹ توانائی، بینکنگ سیکٹر، سول ایوی ایشن و ایلو بشخ آتیٹی چندی مفاہمت نا یات داشت آتیا دستخط کننگ نا گمان ءِ۔ اوپارے کہ ہڑتوم آ فریق ہڑتوم آ ملک آتا نیام اٹ سٹریٹجک شریداری ءِ سوگو کننگ و اسیجائی زرکاری ٹی ودکی نا کمک اٹ گیشتر اقتصادی لائخی و امتیازی وارخواہی تے ہم تالان کننگ اٹی ءُ۔ اوہڑتوم آ ملک آتا زرکارآتیکن اومیت افزا بشخ آتے تالان کننگ نا اہمیت آ زور شاغا۔ سفیر فیصل نیاز ترمذی پارے کہ توانائی، ہوابازی، بندرگاہ ، فوڈ سیکورٹی و بینکنگ نا بشخ نگران وزیراعظم نا دورہ نا فوکس ایریامریرہ۔ ہراٹی ہڑتوم آ ملک آک تاریخی واپاری معاہدہ غاتیا دستخط کننگ آن پد ہڑتوم آ کنڈآتا تعلقداری ٹی پیش رفت نا جاچ ءِ ہلیرہ۔ اومستی پارے کہ پاکستان دا برادرانہ گام اناجم وجوش اٹ خیرمقدم ءِ کیک و اماراتی ایلم تا کنڈآن اہم زرکاری نا خیرمقدم ءِ کننگ اٹ بھاز است خواہی تخک۔ ہڑتوم آ ملک آتا نیام اٹ ہڑتوم آ کنڈآتا واپار نا سالانہ کچ 10 بلین ڈالر ءِ و داٹی ودکی نا بھاز زیات گمان ارے، اوپیدوار کرے کہ متحدہ عرب امارات اٹی 1.8 ملین آن زیات پاکستانی خذمت سرتننگ ءُ ولے متحدہ عرب امارات ءِ داسہ ہم چندی بشخ آتیٹی پین کسبکار کارندہ غاتا گرج ءِ۔
