اسلام آباد۔ 26 نومبر (اے پی پی) نگران وزیراعظم انوارالحق کاکڑ پارینے کہ پاکستان اسہ سوگو دودوربیدہ و تہذیب نا حامل ملک اسے، پاکستان اٹ خراج نا نظام اٹ گچینی اتنگ نا گرج ءِ، بلوچستان قدرتی وسیلہ غاتیان شپ صوبہ اسے، دا قدرتی وسیلہ غاتا سہی کاریم اٹ اتنگ المی ءِ، یک شنبے نادے آ پی ٹی وی نا پروگرام بات سے بات اٹی گپ وتران کرسا نگران وزیراعظم انوارالحق کاکڑ پی ٹی وی ءِ 59 می سال دے انا مبارکبادی ترسا پارے کہ پاکستان نا درستی راستی و سافٹ امیج مچ آ دنیا ٹی تالان کننگ اٹ پی ٹی وی نا بھا زاہم ء کڑد اس مسنے۔ پی ٹی وی نا راگ، میوزک و حوالکاری تون اوار ہر بشخ اٹی پروگرام متاثرکن ءِ، پی ٹی وی پاکستان نا دودوربید ہ ءِ تالان کرے ۔ اسہ سوج اسے نا ورندی ٹی اوپارے کہ پاکستان اسہ پدتموک ملک و ارتقاء نا عمل اٹی ءِ، داحقیقت نا درک آن پین گام گیج ہرفنگ اٹ آسانی مریک۔ بلوچستان نا شونداری آ ہموکان پیش تموک آ وسیلہ غاتا کاریم اٹ اتنگ نا بابت سوج انا ورندی ٹی اوپارے کہ دنیا ٹی دا ڈیہہ معدنی دولت آن شپ ءِ، بلوچستان اٹی تالان آبادی نا سوب آن جان جوڑی و تعلیم تون اوار بندی آسراتی تا فراوانی مشکل مریک، داکان بیدس بلوچستان اٹی وسیلہ غاتا کاریم اٹ اتنگ نا ڈٹ بندی نا کمتی اسہ چیلنج و بدانتظامی ہم اسہ ویل اسے۔ اوپارے کہ دنیا ٹی قدرتی وسیلہ غاتا ہندی کہول آ الس نا گیشر فائدہ غاتیٹی کاریم اٹ اتنگانے و افریقہ ٹی دانا کاریم اٹ اتنگ ہندی کہول آ کم مننگ نا درور ہم ارے۔ اوپارے کہ 18 می ترمیم اٹی بنجا و صوبہ غاتیٹی تنازعہ غاک طے مسنو، بلوچستان اٹی کاپر و گولڈ انا دریافت نا اثربروک آ دے تیٹی مون آ بریک۔
