اسلام آباد۔ 24 نومبر (اے پی پی) نگران وزیراعظم انوارالحق کاکڑ عبوری حکومت نا اہم گام گیج آتا خاکہ اس پیش کرسا پارینے کہ نگران حکومت گچین اسلو ب حکمرانی و اصلاحاتی نقطہ نظر نا حامل میرات آتے ہلک کاہک، نگران حکومت زرگزران، نجکاری و مواصلات تون اوار چندی بشخ آتیٹی سخت چیلنج آتون مون تننگ ءِ۔ جمعہ نادے آ جنگ گروپ آف پبلیکیشنز نا کنڈآن ’’بریک فاسٹ ود دی پرائم منسٹر‘‘ نا سرحال آن اسہ نشست اسے ٹی وزیراعظم انوارالحق کاکڑ پارے کہ نگران حکومت زرگزران، نجکاری و مواصلات تون اوار چندی بشخ آتیٹی مشکل چیلنج آتون مون تننگ ءِ۔ وزیراعظم اسہ گچین پاکستان نا گمان تا بارواٹی تینا وژن ءِ مون آتخسا پارے کہ کسب کار انسانی سرمایہ کیہی چیلنج آتا ایسر ءِ۔ اسہ سوج اسے نا ورندی ٹی اوپارے کہ پاکستان ءِ اقتصادی کمکاری تنظیم نا اسہ اہم علاقائی باسک اس مننگ ناناطہ تینا پبی قدرتی وسیلہ غاتیان بیدس نیامی وسویلی ایشیانا سنگم آ تزویراتی ہند آ واقع مننگ آ گمر ءِ۔ اوپارے کہ 24 کروڑ نا آبادی 25 سال آن کم وئی نا ورناتا کچ اتون انسانی سرمایہ نا قدر اٹی ودکی کیک ولے او پیدوار کرے کہ ٹارگٹڈ ٹریننگ پروگرام تا کمک اٹ ورناتے کسبکار کننگ بے کچ المی ءِ ولے اوفتا توانائی تے جوان وڑاٹ کاریم اٹ اتپننگ نسخان دہ نتیجہ غاتا سوب جوڑ مننگ کیک۔ نگران وزیراعظم پارے کہ نگران حکومت نا اولیت آتیان اسہ اولیت ہندن ءُ پروگرام اسے آ چکار کننگ ءِ ہراٹی اسہ دہائی ٹی 10 لکھ نرس آتے تربیت تننگک۔ اوپارے کہ حکومت چندی بشخ آتیٹی مہارت آتا شونداری کن سیمنز ، جرمنی تون اوار جہانی تنظیم آتون شریداری نا وارخواہی پٹنگ ءِ۔ وزیراعظم پارے کہ حکومت نسخان اٹی چلینگوک آ ریاستی ملکیتی ادارہ غاتا نجکاری آ ترندی اٹ کاریم کننگ ءِ، دا فہرست اٹی پاکستان انٹرنیشنل ایئرلائنز نانجکاری اولیت ءِ، جنوری نا نیام اسکان پبی نتیجہ دوئی مننگ نا اومیت ءِ۔ او ملک ءِ ہلوک ہنوک باصلاحیت بندغ آتے بے سہبی اسے نا علامت تکنگوک آ تاثر ءِ مسترد کرسا پارے کہ پاکستان وڑوڑنا تخلیقی لائخی تا حامل تہذیب ءِ داوڑنا باصلاحیت بندغ آک آخبت اٹ ملک انا میرات جوڑ مننگ کیرہ و دا باندات ءِ پہہ مننگ نا اسہ سنجیدہ ومثبت وڑ ءِ۔ درملکی زرکاری ءِ اتنگ نا بابت سوج اسے نا ورندی ٹی اوپارےکہ خصوصی زرکاری سہولت کونسل (ایس آئی ایف سی ) کاروبار اٹی آسانی نا وارخواہی فراوان کننگ ءِ۔ اوپارے کہ ملک ءِ کشت وکشار، انفارمیشن ٹیکنالوجی و کانڑ کنی نا بشخ آتیٹی ارب آ ڈالر نا درملکی زرکاری نا بارواٹی ہفتہ غاتیٹی جوان خبر نا گمان ءِ۔ اودا پت انا درشانی ءِ کرے کہ ایس آئی ایف سی سول و ملٹری نمائندہ غاتیا تالان اسہ پلیٹ فارم حکومت آتا بدلی آن پد ہم ڈٹ آتا تسلسل ءِ پک کیک۔ اوتینا لائخی ءِ ودفنگ کن کاروباری برادری نا باسک آتے اوار کننگ نا خیال ءِ ہم پک کرے۔ اوپارے کہ ایگزم (ایکسپورٹ امپورٹ) بینک پاکستان ءِ مالیاتی خذمت فراوان کننگ آ کاریم کننگ ءِ ہراڑآن ہندی پوریاگر و زرکارآتے پیشن نا ملک مالی لین دین کننگ اٹ کمک رسینگک۔ رابطہ ءِ اسہ اہم بشخ اسے نا وڑاٹ تالان کرسا اوپارے کہ ٹرانس اوغان ریلوائی ازبکستان ءِ پاکستان تون گنڈک۔ اوپارے کہ کوئٹہ تفتان ریل نیٹ ورک انا گچینی آ ہم کاریم برجاءِ۔ اوپارے کہ آذربائیجان تون ساڑی ہی ٹی بناکروک آ براہ راست جہاز آتیان سفر نا وخت ءُ پاس اٹی کمتی بریک و واپار ءِ مون آ دننگک۔ وزیراعظم خراج اٹی اصلاحات نا مخ تفی ءِ کرسا پارے کہ نگران حکومت خڑچ آتیٹی کمتی آ یخین تخک و فیڈرل بورڈ آف ریونیو (ایف بی آر) نا اصلاحات آ ہم کاریم کننگ ءِ۔
