اسلام آباد۔ 24 نومبر (اے پی پی) نگران بنجائی وزیر داخلہ سرفراز احمد بگٹی پارینے کہ پاکستانی الس گل زمین حجاز تون بے حد پیار کیک و خادمین حرمین شریفین تون بےپناہ عقیدت تخک۔ او اومام کعبہ ڈاکٹر صالح بن عبداللہ بن حمید تون گپ وتران کریکہ ہرا وزیرداخلہ تون اونا ہنکین آ اوڑدہی کرے۔ وزیرداخلہ امام کعبہ ءِ جم وجوش اٹ بخیر کرسا پارے کہ نا کنااُراغا بننگ کنا خوش بختی و مچ آ خاہوت کن خوش بختی نا سوب ءِ ۔ اوپارے کہ پاک سعودی تعلقداری اسیجائی عقیدہ، تاریخ و السی رابطہ غاتیا تالان ءِ، پاکستان سعودی عرب تون برادرانہ تعلقداری تے بے کچ قدرانا نظر اٹ ہرک۔ امام کعبہ پارے کہ مسلمان عقیدہ توحید آ پورو یخین تخک، چنکا اختلاف آتے نفاق نا سوب جوڑ مننگ کن بایدے ہلنگپ، امت نا نیام اٹ سیوت ءِ مون آدننگ نا گرج ءِ۔ اوپارے کہ امت مسلمہ ءِ مون تروک ویل آتا بھلا سوب فرقہ واریت و غیرضروری اختلاف آک ءُ، اسہ ایلو نا سلاہ نا شرف ءِ کننگ و تین پہ تینی ہم گرنچی ءِ مون آ دروئی مریک، اسہ ایلو نااست ءِ کٹر نئے کہ تینا سلاہ ءِ مسلط کیر۔ وزیرداخلہ امام کعبہ نا اعزاز اٹی ناشتہ نا ہم بست وبند ءِ کرے۔
