اسلام آباد۔ 24 نومبر (اے پی پی) نگراں بنجائی وزیر حوالکاری، شینکاری و پارلیمانی امور مرتضیٰ سولنگی پارینے کہ نگراں حکومت آزادانہ، انصاف اٹ وشفاف گچین کاری تا اڈتننگ کن سنبرینگوک ءِ و گچین کاری تا اڈتننگ کن الیکشن کمیشن آف پاکستان ءِ ہرممکن آسراتی فراوان کیک۔ داڑے جاری کروک پریس ریلیز نا رداٹ داہیت ءِ او پنچ شنبے نادے آ اسلام آباد پالیسی ریسرچ انسٹیٹیوٹ نا صدر ڈاکٹر رضامحمد نا کماشی ٹی ڈل اتون گپ وتران کرسا پارے۔ اوڑدہی ٹی ساڑی ملکی سیاسی و زرگزرانی حالیت، جعلی خبر و ڈس انفارمیشن نا چٹفنگ، بروک آ لس گچین کاری ، سوشل میڈیا نا ویل، سویلی ایشیاء نا ایلو ملک آتیٹی گچین کاری تتون اوار چندی امور تیا گپ وتران مس۔ ڈل نگراں بنجائی وزیر حوالکاری ءِ ملک انا سیاسی منظرنامہ غا اسلام آباد پالیسی ریسرچ انسٹیٹیوٹ نا تازہ انگا پٹ وپول آ ن معلومدار کرے و نگراں حکومت نا انصاف اٹ ، آجو و شفاف گچین کاری تے پک کننگ نا عزم انا ستاءِ کرے۔ داوخت آ گپ وتران کرسا مرتضیٰ سولنگی پارے کہ غٹ سیاسی جماعت آتے اسہ وڑ وارخواہی فراوان کننگ انگ ءِ ، کس اسے تون پرخ مفک۔ اوپارے کہ ملک اٹی سیاسی چاگڑد ءِ گچین کننگ کن غٹ سیاسی جماعت آتا نیام اٹ امنائی سلاہ نا مون آ دننگ المی ءِ۔ مرتضیٰ سولنگی پارے کہ مس انفارمیشن ، ڈس انفارمیشن و فیک نیوز مچ آ دنیا نا ویل ءِ، سوشل میڈیا غا غٹ آن بھلا چیلنج جعلی خبرآک ءُ ہرافتا چٹفنگ اٹ غٹ اسٹیک ہولڈر آتے تینا کڑد ءِ ادا کروئی مریک۔ اوڑدہی ٹی بروک آ لس گچین کاری تیٹی میڈیانا کڑد آ ہم گپ و تران مس۔ نگراں بنجائی وزیر حوالکاری پارے کہ میڈیا ءِ گچین کاری تیٹی سازگار چاگڑد اس فراوان کننگک، ریاستی میڈیا غا غٹ سیاسی جماعت آتے اسہ وڑ کوریج فراوان کننگ انگ ءِ۔ نگراں بنجائی وزیر حوالکاری پارے کہ یکجہتی نا شاندار درشانی ءِ کرسا مسہ بھلا جماعت آتیان اِرا جماعت پاکستان مسلم لیگ (ن) و پاکستان پیپلزپارٹی نا سروک آک شفاف و بے کنڈ ہلوک گچین کاری تے پک کننگ کن غٹ سیاسی جماعت آتا مخ تفی آ زور شاغنگ نا بابت صدر مملکت و نگران وزیراعظم تون ہم گرنچ مسنو۔ دارداٹ اسیجائی اعلامیہ دا ودوک آ امنائی نا عکاسی ءِ کیک کہ 8 فروری 2024 ء آ مروک آ گچین کاری تا سرسہبی ءِ پک کننگ کن غٹ جماعت آک کمک کیر۔ اوپارے کہ 8 فروری نا تاریخ نا پڑو ءِ چیف الیکشن کمشنر سکندرسلطان راجہ 2 نومبرآ صدر مملکت تون سلابت آن پد کرے۔ صدر داپت انا درشانی ءِ کرے کہ قومی اسمبلی نا تحلیل آن پد نگران وزیراعظم گچین کاری تا آجو و انصاف اٹ اڈتننگ ءِ پک کیک۔ نگران بنجائی وزیر حوالکاری وزیراعظم انوارالحق کاکڑ نا حوالہ تس ہراپاریسس کہ‘‘نن آجو، انصاف اٹ و شفاف گچین کاری تے پک کینہ۔ نن آجو انصاف اٹ و شفاف وڑاٹ گچین کاری کرفنگ آ پورو چکارتخانن و دامسخت کن الیکشن کمیشن نا پورو مخ تفی ءِ کننگ اُن۔ نگراں بنجائی وزیر حوالکاری پارے کہ الیکشن کمیشن کن توار آصف علی زرداری ہرفے ہرا 2008ء آن 2023 ء اسکان پاکستان نا صدر رہینگا و پاکستان پیپلزپارٹی نا شریک چیئرمین ءِ۔ پیپلزپارٹی 2018ء نا گچین کاری تیٹی مسٹ میکو بھلا جماعت جوڑ مرسا مون آبس۔ آصف علی زرداری پارے کہ ملک شفاف گچین کاری تا کنڈآ ہِننگ ءِ و کنے الیکشن کمیشن آ پورو پت ءِ و تران کرے کہ غٹ اسٹیک ہولڈر آتیکن گچین کاری تیٹی بشخ ہلنگ المی ءِ انتئے کہ پاکستان اٹ داوخت آ گچین کاری تیکن چاگڑد سازگار ءِ، گچین کاریک تینا وخت آ مریر۔ نگران بنجائی وزیر حوالکاری پارے کہ مسکوہی قومی اسمبلی ٹی بھلا جماعت مسلم لیگ (ن) نا راہشون مریم اورنگزیب آصف علی زرداری نا دا تران نا خیرمقدم ءِ کرے و اودے است بڈ گوندا و ایلو سیاسی راہشون تیان ہم دانا پیروی ءِ کننگ نا خواست کرے۔
