کوئٹہ۔ 24 نومبر (اے پی پی)پاکستان پیپلزپارٹی زالبول ونگ انا صوبائی صدر و مسکوہی صوبائی وزیر غزالہ گولہ ، جنرل سیکرٹری زرینہ زہری ئسک پارینو کہ ملک اٹی ساف و شفاف و بے کنڈ ہلوک گچین کاری تیان پاکستان شونداری و شونہالی نا کنڈآ ہِننگ کیک، بلاول بھٹو زرداری ملک ءِ ساڑی تنکی تیان کشنگ کیک، 30 نومبر آ کوئٹہ ٹی یوم تاسیس نا بابت مروک آ جلسہ تاریخی اہمیت تخک، پاکستان پیپلزپارٹی نا جیالہ و زالبول آک جلسہ نا سرسہبی کن تینا غٹ لائخی تے کاریم اٹ اتیر، زالبول آک ملک انا آبادی نا نیمہ بشخ ءُ اوفتے غٹ بشخ آتیٹی بریبرنمائندگی تننگ آن بیدس ملک شون ہلنگ کپک۔ داہیت ءِ او فک جمعہ نادے آ تینا ہنکین آ 30 نومبر آ مروک آ لس جلسہ نا تیاری تا بابت زالبول آتا اسہ دیوان اسے آن تران کرساپارے۔ اوفک پاریر کہ پاکستان پیپلزپارٹی ہمواسٹ انگا سیاسی وجمہوری جماعت ءِ ہرا ملک انا شونداری و شونہالی ناکنڈآ دننگ کیک، پیپلزپارٹی و الس نا رشتہ روح و جون انا ءِ، 8 فروری آ ملک اٹی مروک آ لس گچین کاری تیٹی پیپلزپارٹی ءِ الس وونٹ ترسا سرسہب کیک و چیئرمین بلاول بھٹو زرداری انشاء اللہ ملک انا پوسکن آ وزیراعظم مریک۔ اوفک پاریر کہ پاکستان پیپلزپارٹی نا چیئرمین بلاول بھٹو زرداری پارٹی نا 56 می یوم تاسیس نا مرکزی جلسہ کوئٹہ ٹی کننگ نا پڑو کرینے انشاء اللہ دا جلسہ عام بلوچستان نا سیاسی تاریخ نا غٹ آن بھلا سیاسی جلسہ مریک جلسہ ٹی کوئٹہ تون اوار مچ آ بلوچستان آن پاکستان پیپلزپارٹی ناجیالہ و زالبول آک بشخ ہلیرہ۔ اوفک پاریر کہ زالبول ملک انا آبادی نا نیمہ بشخ ءُ اوفتے غٹ بشخ آتیٹی جوان نمائندگی تننگ آن بیدس ملک شون ہلنگ کپک پاکستان پیپلزپارٹی اسٹ انگا جماعت ءِ ہرا زالبول آتے غٹ بشخ آتیٹی مون آایسنے۔ اوفک پاریر کہ زالبول آک 30 نومبر آ مروک آجلسہ ٹی پبی بشخ ہلسا داپک کیرہ کہ بلوچستان نا زالبول آک ہم پیپلزپارٹی تون تفوک ءُ۔
