اسلام آباد ۔ 24 نومبر (اے پی پی) بنجائی وزیر حوالکاری وشینکاری و پارلیمانی امور مرتضیٰ سولنگی پارینے کہ جان جوڑی کن نسخان دہ دیر و گڑاتیار کروک آتا برخلاف کارروائی کننگانے، انسانی زند آتے خطرہ ٹی شاغوک آتیکن 50 ہزار روپئی ڈنڈ و اسہ سال انا سزا کم ءِ۔ جمعہ نادے آ سینیٹ اٹی وقفہ سوج آتیٹی سینیٹر مشتاق احمد و سینیٹر نزہت صادق نا سوج آتا ورندی ٹی مرتضیٰ سولنگی پارے کہ اسہ سرکاری ادارہ اسے کرپشن نا گڑھ پاننگ افسوز نا قابلءِ، قائد اعظم محمد علی جناح نا 11 اگست 1947 ء نا اولیکو تقریر آن ہلیس داتم اسکان ننا تقریر آتیٹی کرپشن نا باندات ضرور اوار مسنے ، فاضل سینیٹرتون داادارہ نا بارواٹی کرپشن نا بابت اشہدی ارے تو ضرور معلومدار کے، تعلقدار ادارہ غاتیان جاست وپاست کرفنہ۔ نگران بنجائی وزیر پارے کہ پی سی آر ڈبلیو آر تینا سہ ماہی رپورٹ ءِ اپریل آن جون 2022ء ٹی دیر انا 20 برانڈ آتے مضرصحت گونداسس، دافتیان اِرا برانڈ ہندن ءُ ہرا پی ایس کیوسی اے نا رداٹ رجسٹرڈ ئسر، لیسن یافتہ دا اِرا برانڈ آتا برخلاف ایکشن ہلنگا و دافتاپروڈکشن ءِ بند کننگا، ہراتم اسکان دا برانڈ آتا پروڈکٹس آب آ پورو سلپ، ہموتم اسکان اوفتے ملنگتو، ایلو 18 برانڈ رجسٹرڈ الورہ۔
