اسلام آباد۔ 24 نومبر(اے پی پی) نگران بنجائی وزیر خارجہ جلیل عباس جیلانی پارینے کہ غزہ و فلسطین نا حالیت آک بے کچ گھمبیر ءُ ، ہموڑے مروک آ بھسکاری نا داکان مہالو ہچ ءُ درور اس ملپک، اسرائیل جنگی ڈوہ انا مرتکب مننگ ءِ، غزہ ٹی خاہوت آتا خاہوت چٹانے، پاکستان نا حکومت فلسطین نا ویل انا ایسری وفلسطینی الس نا مشکل آتا چٹفنگ کن تینا کڑد ءِ ادا کرسا کیک۔ جمعہ نادے آ سینیٹ نا دیوان اٹی سینیٹر مشتاق احمد نا چکاری نوٹس نا ورندی ٹی نگران وزیرخارجہ جلیل عباس جیلانی پارے کہ غزہ و فلسطین ناحالیت آک بے کچ گھمبیر ءُ، تدوک آ یک و نیم تُو اٹی ہموڑے ہرابھسکاری مسنے اونا ہچ ءُ درور اس ملیپک، 18 ہزار آن زیات شہید و 40 ہزار آن زیات ٹھپی ءُ، غزہ کم و ود بھس مسنے۔ اوپارے کہ اسرائیل جنگی ڈوہ انامرتکب مننگ ءِ پاکستان ہمو منہ ملک آتیٹی اوار ءِ ہرافک اسرائیلی ظلم ءِ نسلی کشی گوندانو، دنیا داویل انا ایسری آ چکارکے۔ اوپارےکہ خاہوت آتا خاہوت غزہ ٹی چٹانے لکھ آ چناک بے یارومددگار ءُ، حماس تون اسرائیل نا 250 بندی وخت اس کہ 7 ہزار آن زیات فلسطینی بندی اسرائیل تون ءُ، جنگ بندی نا معاہدہ نا رداٹ اسرائیل 150 فلسطینی و حماس 50 اسرائیلی یرغمالی تے رہاکیک۔ اوپارے کہ اسرائیل و جہانی برادری آ ہرا زور ءِ شاغنگانے اونا نتیجہ ہم مون آ بسنے، و قطر ہراکڑد ءِ ادا کرینے، دا او آئی سی نا کوشست آتا ہی ردعمل ءِ۔
