اسلام آباد۔ 23 نومبر (اے پی پی) نگراں بنجائی وزیر قومی جان جوڑی ڈاکٹر ندیم جان تون برطانیہ نا وزیر مملکت جان جوڑی اینڈ ریوسٹیفن سن اوڑدہی کرے۔ پنچ شنبے نادے آ وزارت جان جوڑی آن جاری بیان نا رداٹ اوڑدہی ٹی ڈاکٹر ندیم جان برطانیہ نا وزیر مملکت جان جوڑی ءِ پاکستان اٹ 10و11 جنوری 2024 آ اڈ ہلوک آ ’’گلوبل ہیلتھ سیکورٹی سمٹ‘‘ اٹی بشخ ہلنگ نا سلہ خلک و اوڑتون اوار داتاریخی سمٹ نا اسیجائی میزبانی نا سلہ ہم خلک ہراڑا اینڈ ریوسٹیفن سن خوشی نا درشانی و نگران بنجائی وزیر قومی جان جوڑی نا خصوصی منت واری ءِ ہم ہرفے۔ نگران بنجائی وزیر قومی جان جوڑی ڈاکٹر ندیم جان برطانوی حکومت نا کنڈآن جان جوڑی نا چندی بشخ آتیٹی برجاکمکاری آ منت واری ءِ ہرفے، برطانیہ نا وزیر مملکت جان جوڑی نیوٹریشن نا بابت پاکستان نا موقف نا ستاء کرے و پارے کہ جان جوڑی نا بشخ اٹی بھلو کچ اسے آ اصلاحات کننگ انگ ءِ تانکہ نئے بیرہ پاکستان بلکن اسہ رکھ و جان جوڑ دنیا سے نا تغ پورو مننگ کے۔ بنجائی وزیر جان جوڑی ڈاکٹر ندیم جان پارے کہ یونیورسل ہیلتھ کوریج ءِ سوگو کننگ ، فارماپارک انا جوڑ کننگ، 500 بنداوی ہند آتا گونڈ مداٹی اپ گریڈیشن ننا اولیت ءِ۔
