اسلام آباد۔ 23 نومبر (اے پی پی) نگراں وزیر انفارمیشن ٹیکنالوجی و ٹیلی کمیونیکیشن ڈاکٹر عمرسیف پاکستان نا آئی ٹی ایکسپورٹ اٹی ودکی نا حکمت عملی نا پڑو کرے ہرانا رداٹ بروک آ 3 سال اٹی آئی ٹی ایکسپورٹ نا کچ ءِ 10 ارب ڈالر اسکان ودفنگک۔ پنچ شنبے نادے آ اسلام آباد نا ہندی ہوٹل اٹی سٹریٹجی رپورٹ ءِ جاری کننگ نا دود آن بحیثیت مہمان خاص تینا تران اٹی ڈاکٹر عمرسیف پارے کہ آئی ٹی سیکٹر اسٹ انگا بشخ ءِ ہرا پاکستان نا زرگزران نا سوگوی ٹی مرکزی کڑد ادا کننگ کیک، داسیکٹر ءِ فعال کننگ و محکمانہ اڑاند آتے مر کننگ اٹ ایس آئی ایف سی نا مرکزی کڑد اسے، اسپیشل انویسٹمنٹ فیسیلی ٹیشن کونسل نا فورم پاکستان اٹ جہانی زرکاری کن کسر تے آوار کننگ ءِ۔ اوپارے کہ رپورٹ آکسفورڈ یونیورسٹی و پرائس واٹر ہاؤس کُوپر نا شریداری اٹ تیار کرفنگا و داحکمت عملی ٹی پاکستان سافٹ ویئر ایکسپورٹ بورڈ و آئی ٹی ایسوسی ایشن نا مرکزی کڑد مریک۔ ڈاکٹر عمرسیف آئی ٹی برآمد آتے ودفنگ نا حکمت عملی نا بابت پارے کہ داوخت آ سرکاری حساب وکتاب نا رداٹ آئی ٹی ایکسپورٹ 2 ارب 60 کروڑ ڈالر ءِ نن ساڑی آ آئی ٹی ورک فورس اٹی پین 2 لکھ کسبکار آتا ودکی ءِ کیرہ ہراڑآن ایکسپورٹ 5 ارب ڈالر اسکان ودک، ای روزگار اسکیم نا رداٹ 10 ہزار فری لانسنگ سینٹر آتا جوڑ کننگ آن 3 ارب ڈالر آتا زر انا ودکی مریک ہنداوڑ آئی ٹی کمپنی تے ڈالر تخنگ نا موکل تننگ آن ایکسپورٹ اٹی اسہ ارب ڈالر ودکی مریک، وخت اس کہ پاکستان سٹارٹ اپ فنڈ انا قیام آن آئی ٹی ایکسپورٹ نا جم کچ اٹی پین 1 ارب ڈالر ودکی اودے 10 ارب ڈالر نا ہدف پورو کننگ اٹ کمکار مریک۔
