کوئٹہ۔ 23 نومبر (اے پی پی) کنٹرولر بلوچستان بورڈ آف انٹرمیڈیٹ اینڈ سیکنڈری ایجوکیشن گودی عابدہ کاکڑ کوئٹہ ٹی برجاایف ایس سی سپلمنٹری امتحان تا سینٹرآتا بورڈ آفیسر آتون اوار اناگت دورہ ءِ کرے۔ دورہ ٹی اسلامیہ کالج شفیق احمد خان اسکول سنڈیمن ہائی اسکول آن کم و ود 20 آن زیات ڈپلیکیٹ طالب علم آتے نقل اتون ہلسا اوفتا برخلاف کارروائی نابناءِ کرینے وخت اس کہ موقع غا ڈیوٹی اسٹاف ءِ وارننگ لیٹر جاری کننگانے۔ داہیت ءِ او پنچ شنبے نادے آ میڈیا نا نمائندہ غاتون گپ وتران کرساپارے۔ کنٹرولر بلوچستان بورڈ آف انٹرمیڈیٹ اینڈ سیکنڈری ایجوکیشن گودی عابدہ کاکڑ پارے کہ بلوچستان بورڈ ءِ مینوئل نظام آن پدریسہ ڈیجیٹلائزیشن آ گدریفنگانے و الس ءِ آخبت اٹ پین گچین آسراتی دُوبریک نقل اسہ ناسور اسے ہرا ملک انا پوسکن آ چین ءِ جہالت نا تہاری تیٹی خسنگ ءِ بلوچستان حکومت دا ناسور ءِ چٹفنگ کن ہروڑنا کوشست کننگ ءِ ، ننے غٹ ءِ اواری اٹ عملی جہد کروئی مریک صوبہ نا چناتے نقل آن بچفسا اوفتے علم انا دولت آن آراستہ کروئی مریک انتئے کہ ہراڑے چناک نقل کرسا پاس مریرہ ولے او عملی زند اٹی اسُل سرسہب مفسہ اینو ننے دا قول کروئی ءِ کہ نقل کون آ لعنت ءِ چٹفوئی مریک چناتے خوانفسا اسہ باشعور شار ی اس جوڑ کروئی مریک انتئے کہ اوفتے مکل و قوم اناخذمت ءِ کروئی ءِ اینو دنیا ٹی ہموقومک شون ہلوک ءُ ہرافک علم ءِ تینا سلہہ جوڑ کریر و تینا ملک آن جہالت ءِ چٹفیر ننے ہم تینا ملک انا شونداری و شونہالی کن علم انا شمع ءِ پین روشناکروئی مریک ہنداٹی ننا غٹ انا سرسہبی ءِ اوپارے کہ نقل اسہ ناسور اسے ہرا ملک انا پوسکن آ چین ءِ جہالت نا تہاری ٹی خسنگ ءِ ، بلوچستان بورڈ مدام قومی است خواہی تا رداٹ ساف وشفاف امتحان تے پرامن چاگڑد اٹ اڈترسا دا کلہو ءِ تسنے کہ بلوچستان بورڈ تینا قومی فرض ءِ پورو کننگ کن ہروخت تیار ءِ اسہ سوج اسے نا ورندی ءِ ترسا گودی عابدہ کاکڑ پارے کہ بلوچستان بورڈ اٹی اصلاحات نا عمل برجاءِ و ننا کوشست ءِ کہ اصلاحاتی ڈٹ آتے عملی دروشم اس ترسا بورڈ انا امور نا بابت الس ءِ زیات آن زیات آسراتی اوفتا درگہ اسکان سرکننگک اوپارے کہ داکان مست آن لائن ڈگری، ڈی ایم سی نا جاری کننگ، سند آتے پک و ری کاؤنٹنگ پروسیجر نا آسراتی فراوان کننگانے۔ ’’ڈیمز ایپ ‘‘ نا باقاعدہ بنا ءِ تدوک آ سال آن کننگانے دا پوسکن آ سسٹم نا رداٹ بلوچستان نا غٹ امتحانی مرکز آتیٹی متعین عملہ نا حاضری ءِ سد درسد پک کننگ مریک ڈیجیٹل سسٹم نا سوب آن امتحانی نتیجہ غاتا مرتب کننگ اٹ کم وخت خڑچ مریک و امتحان تیان پد نتیجہ غاتا پڑو نا دورانیہ کم مریک داکان بیدس امتحانی مرکز آتا دورہ ءِ کروک آ سینٹرز انسپکٹرز نا رپورٹ آ بیدس التواآن دمدستی کارروائی کننگک۔
