کوئٹہ۔ 22 نومبر (اے پی پی)پاکستان پیپلزپارٹی بلوچستان نا راہشونک پارینو کہ پاکستان پیپلزپارٹی نا السی مقبولیت ءِ خنسا مخالف آک ہبکئی نا گواچی مسنو ، پاکستان پیپلزپارٹی 8 فروری آ مروک آ لس گچین کاری تیٹی بھلو گیشتری اسے اٹ سرسہبی دوئی کیک و چیئرمین بلاول بھٹو زرداری ملک انا پوسکن آ وزیراعظم مریک، پارٹی نا چیئرمین بلاول بھٹو زرداری و ایلو سرکڑدہ غاتا کوئٹہ غا سرمننگ آ 30 نومبر آشاندار استقبال ءِ کننگک، ریڈیو پاکستان ایمپلائز یونین بلوچستان نا صدر عبدالرزاق نا پارٹی ٹی شمولیت آن پیپلزپارٹی پین فعال مریک۔ داہیت ءِ پاکستان پیپلزپارٹی بلوچستان نا ڈپٹی جنرل سیکرٹریز حاجی خان محمد بڑیچ، میر محی الدین رند، آفس سیکرٹری اختر بلوچ پیپلزلیبر بیورو بلوچستان نا صدر شاہجہان گجر، پیپلزیوتھ آرگنائزیشن نا ڈپٹی جنرل سیکرٹری ملک حنیف کاکڑ ماما عبدالصمد بڑیچ و ایلو فک پاکستان پیپلزپارٹی بلوچستان نا سیکرٹریٹ اٹی ریڈیوایمپلائز یونین بلوچستان نا صدر عبدالرزاق کر دانا تینا سنگت آتون اوار پیپلزپارٹی ٹی اوار مننگ نا وخت آ اڈہلوک آ دود آن تران کرساپاریر۔ اوفک ریڈیو ایمپلائز یونین بلوچستان نا صدر عبدالرزاق و اونا سنگت آتے پاکستان پیپلزپارٹی ٹی اوار مننگ آ مبارکبادی ترساپاریر کہ اوفتا اوار مننگ آن پاکستان پیپلزپارٹی پین فعال ومنظم مریک۔ اوفک پاریر ملک اٹی ساف و شفاف گچین کاری تا اڈتننگ نگران بنجائی و صوبائی حکومت و الیکشن کمیشن نا زمواری ءِشفاف گچین کاری تا اڈتننگ نا نتیجہ ٹی جوڑ مروک آ حکومت ہی الس نا ویل آتے سہی وڑاٹ ایسر کننگ کیک۔ اوفک پاریر کہ پاکستان پیپلزپارٹی مدام اِرغ، پچ و ہند انا نعرہ ءِ خلکنے پارٹی ہراتم کہ برسراقتدار بس سرکاری ملازم آتا ویل آتے ایسر کننگ کن عملی گام گیج کرے و اوفتا تنخواہ تیٹی کبینی نا رداٹ کیہی سد گنا ودکی کننگا۔ اوفک پاریر کہ 30 نومبر آ کوئٹہ ٹی پیپلزپارٹی نا یوم تاسیس نا بابت مروک آ جلسہ بلوچستان نا تاریخ نا انشاء اللہ غٹ آن بھلا سیاسی جلسہ مریک پارٹی نا چیئرمین بلاول بھٹو زرداری و ایلو سرکڑدہ غاتا کوئٹہ غا سرمننگ آ شاندار استقبال ءِ کننگک پارٹی نا جیالہ غاک جلسہ نا سرسہبی کن تینا جہد ءِ ترند کیر و الس تون خڑکی رابطہ تخر۔
