اسلام آباد۔ 22 نومبر (اے پی پی) نگران وزیر موسمیاتی بدلی و چاگڑدی رابطہ احمد عرفان اسلم موسمیاتی بدلی تا بارواٹی جہانی کانفرنس ، کوپ۔ 28 نا بابت ویب سائٹ نا بناءِ کرے۔ دا ویب سائٹ وزارت موسمیاتی بدلی و نیشنل ڈیزاسٹر رسک مینجمنٹ فنڈ(این ڈی آرایم ایف) تیارکرینے ہراڑا کوپ ۔ 28 نا ایونٹ آتے لائیو اسٹریم کننگک۔ چارشنبے نادے آداڑے وزارت موسمیاتی بدلی و نیشنل ڈیزاسٹر رسک مینجمنٹ فنڈ انا کنڈآن پری کوپ۔ 28 دود اٹی ویب سائٹ نا بناءِ کننگا۔ نگران وزیر موسمیاتی بدلی و چاگڑدی رابطہ احمد عرفان اسلم، متحدہ عرب امارات ناسفیر و ایلو بڑزکو کمامدارآک دود اٹی بشخ ہلکر۔ دود آن تران کرسا نگران وزیرپارے کہ دنیا ءِ موسمیاتی بدلی تا ویل ءِ امنا کرسا اوفتے تون مون تننگ کن بھاز گڑا کننگ نا گرج ءِ، اینو نادود ہم ہندا چرجوئی نا اسہ کڑی اسے۔ اوپارے کہ پاکستان موسمیاتی بدلی تا ویل ءِ بھاز اہمیت ایتک۔ اوپارے کہ موسمیاتی بدلی نا بارواٹی جہانی کانفرنس کوپ۔ 28 اٹی پاکستان انرجی ٹرانزیشن نا باندات آ زور شاغک۔ دابشخ اٹی کمکاری ءِ ودفنگ کن گپ وتران کننگک۔ اوپارے کہ موسمیاتی بدلی تا ویل آتون مون تننگ کن قابل تجدید توانائی نا ذریعہ غا سیبو ءِ ودفنگ نا گرج ءِ۔ ننے گلوبل کلائمیٹ فنانسمارکیٹ کن تینا وسیلہ غاتے موبلائز کروئی مریک۔ داوخت آ پاننگاکہ کوپ۔ 28 نا بابت ویب سائٹ وزارت موسمیاتی بدلی و نیشنل ڈیزاسٹر رسک مینجمنٹ فنڈ اس تیارکرینے۔ داویب سائٹ آ کوپ۔ 28 نا ایونٹ آتے لائیو اسٹریم کننگک و کانفرنس نا بابت ہڑدے نا اپ ڈیٹ آتے شیئر کننگک۔ داکان بیدس این ڈی آرایم ایف نا کنڈآن کوپ۔ 28 آ نیوز لیٹر نا ہم بناءِ کرے۔
