اسلام آباد۔ 21 نومبر (اے پی پی) نگران بنجائی وزیر حوالکاری، شینکاری و پارلیمانی امور مرتضیٰ سولنگی متحرک، متنوع و زموار میڈیا منظرنامہ ءِ مون آدننگ نا حکومتی عزم انا درشانی ءِ کرسا پارینے کہ اینو ننے میڈیا نا بشخ اٹی بھاز انگا چیلنج مون تروک ءِ ، ٹیکنالوجی نا ترند رفتار شونداری میڈیاٹی کاریم اٹ اتو ک آ وڑوڈول آتے بدل کرینے، دا چیلنجنگ چاگڑد اٹ ننا بنداوی چکار پاکستانی میڈیا انڈسٹری ءِ سوگو کننگ آ بایدے مرے۔ داہیت ءِ او سے شنبے نادے آ داڑے بنجائی سیکرٹری حوالکاری شاہیرہ شاہد و مسکوہی سیکرٹری ظہور احمد تون اوڑدہی ٹی گپ وتران کرسا پارے۔ داوخت آ نگران بنجائی وزیر حوالکاری شاہیرہ شاہد ءِ سیکرٹری حوالکاری نا عہدہ ءِ سنبھالنگ آ مبارکبادی پیش کرے و سیکرٹریٹ گروپ نا سینئر آفیسر مسکوہی سیکرٹری ظہور احمد نا وزارت حوالکاری کن خذمت آتے خراج تحسین پیش کرے۔ اوڑدہی ٹی وزارت حوالکاری نا کارکڑد ، میڈیا انڈسٹری ءِ مون تروک چیلنج و وارخواہی، پیشن نا ملک پاکستان نا مثبت دروشم ءِ مون آدننگ اٹ وزارت نا کڑد اتون اوار اہم امور آ گپ و تران مس۔ اوڑدہی ٹی میڈیا انڈسٹری ءِ مون تروک چیلنج و وارخواہی تتون مون تننگ کن میڈیا انڈسٹری تون اواری اٹ کاریم کننگ نا عزم انا درشانی ءِ کننگا۔ مرتضیٰ سولنگی پارے کہ بنجائی سیکرٹری حوالکاری شاہیرہ شاہد و مسکوہی سیکرٹری ظہور احمد قابل ءُ آفیسر ءُ، اوفتے تون کاریم کننگ کنکن گمرنا سوب ءِ۔ اوپارے کہ حکومت متحرک، متنوع و زموار میڈیا منظرنامہ ءِ مون آ دننگ کن سنبرینگوک ءِ۔ اوپارے کہ اینو ننے میڈیانا بشخ اٹی بھاز انگا چیلنج مون تروک ءِ، ٹیکنالوجی نا ترند رفتار شونداری میڈیا ٹی کاریم اٹ اتوک آ وڑوڈول ءِ بدل کرینے، دا چیلنجنگ چاگڑد اٹ ننا بنداوی چکار پاکستانی میڈیا انڈسٹری ءِ سوگو کننگ آ بایدے مرے۔ مرتضیٰ سولنگی پارے کہ ننے جہانی کہول آ پاکستان نا مثبت تشخص، تینا پبی دودوربیدہ ئی میرات و راجی و اقتصادی سرسہبی تے دنیا نا مون آ بایدے پیش کننگے۔ اوپارے کہ میڈیا نا آجوئی و صحافی تا حق انا رکھ ننا پکا عزم ءِ۔ اوپارے کہ حوالکاری وشینکاری نا بشخ پاکستان نا آخبت نا ٹہیفنگ اٹ اہم ءُ کڑد اس اداکیک۔
