کراچی۔ 20 نومبر (اے پی پی) پاکستان پیپلزپارٹی نا چیئرمین بلاول بھٹو زرداری پارینے کہ چناتا دے دنیا غان خواست کننگ ءِ کہ غزہ ٹی چناتا برخلاف برجاظلم ءِ دمدستی توروئی مریک ، غزہ ٹی ہر 10 منٹ اٹی اسہ چناس اسرائیلی بارود نا شست مننگ ءِ ، چناتا بہیمانہ خون بربریت نا بھاز گندہ ءُ دروشم اسے، فلسطینی چناتیا مروک آ ظلم آ انسانیت مدام شرمندہ سلک۔ دعاکیوہ، پاکستان تون اوار مچ آ دنیا نا چناتا آخبت امن، مہرومریبت و شونہالی آن پُرمرے، ملکی وسیلہ غاتیا غٹ آن اولیکو حق چناتا ءِ، ننا چناک ہی پاکستان نا غٹ آن نہادی خزانہ و روشنا آخبت ءُ۔ بلاول ہاؤس نا میڈیا سیل آن جاری بیان نا رداٹ بلاول بھٹو زرداری چناتا جہانی دے انا وخت آ تینا کلہو اٹی مستی پارے کہ الیکشن آن پد بروک آ پی پی پی حکومت نا اولیت آتیٹی چناتا تعلیم، جان جوڑی و رکھ آ زرکاری کننگ اوار مریک، پیپلزپارٹی مدام چناتا رکھ و آسودہی کن انقلابی گام گیج کرینے۔ بلاول بھٹو زرداری پارے کہ شہید بھٹو نا تروک آ 1973نا آئین چناتا غٹ حق انا ضمانت ایتک، شہید بینظیر بھٹو پاکستانی چناتے پولیو کون آ موذی مرض آن بچفنگ کن ویکسی نیشن پروگرام اس درستی راستی کرفے۔ سندھ چائلڈ اتھارٹی ایکٹ۔ 2011، سندھ رائیٹ آف چلڈرن ٹوفری اینڈ کمپلسری ایجوکیشن ایکٹ۔ 2013 و سندھ چائیلڈ میریج رسٹرینٹ ایکٹ ۔ 2013دانا درورآک ءُ، ہندا کانود سازی ٹی پروٹیکشن آف بریسٹ فیڈنگرولز۔ 2009 و سندھ پروٹیکشن اینڈ دی پروموشن آف بریسٹ فیڈنگ اینڈ چائیلڈ نیوٹریشن ایکٹ۔ 2013 اوار ءِ ۔ بلاول بھٹو زرداری پارے کہ 1973 نا آئین و اقوام متحدہ نا کنونشن ءِ مون آ تخسا نن چناتا تعلیم ، جان جوڑی، شونداری و رکھ انا حق انا فراوانی ءِ پک کننگ کن جہدءِ برجاتخنہ۔
