اسلام آباد۔ 20 نومبر (اے پی پی) صدر مملکت ڈاکٹر عارف علوی تون یونیسیف نا پندار کروک چناتا ڈل انا جہانی یوم اطفال نا چرجوئی ٹی اوڑدہی کرے۔ چناتا ڈل ہر چار آصوبہ، گلگت بلتستان و آزاد جموں وکشمیر نا چناتا نمائندگی ءِ کریکہ۔ ایوان صدر نا پریس ونگ انا رداٹ ڈل انا کماشی ءِ پاکستان اٹ یونیسیف نا اولیکو یوتھ ایڈووکیٹ 16 سال انا تقویٰ احمد کرے۔ چناتا ڈل آخبت کن تینا اومیت، گمان آتا بارواٹی صدر مملکت ءِ پارے۔ اوڑدہی ٹی ڈل چناتے مون تروک چندی ویل و چیلنج آتے ہم مون آتخا۔ صدر مملکت ڈاکٹر عارف علوی پارے کہ پاکستان چناتا حق و آسودہی کن گام گیج کننگ کن سنبرینگوک ءِ، چناتے تعلیم ، کسب و تربیت آن آراستہ کننگ کن گام گیج کننگ انگ ءِ۔ خصوصی چناتے باقاعدہ اسکول آتیٹی جوان تعلیم فراوان کننگ نا گرج ءِ۔ اوپارے کہ خصوصی چناتے راج انا مرکزی دنگ انا بشخ جوڑ کروئی مریک، خصوصی چناتے مہارت آتیان آراستہ کننگ آن اوفتے روزگارنا دوئی کننگ اٹ کمک رسینگک۔ چناک صدر مملکت آن موسمیاتی بدلی، مسن تا تعلیم، خصوصی چنا و اوفتے مون تروک ایلو چیلنج آتا بارواٹی جتا سوج اَرفیر۔ اوڑدہی ٹی چناک صدر مملکت ءِ تینا آزموندہ غاتا بارواٹی پاریر۔ چناک زند اٹی مون آ ہِننگ، سازگار چاگڑد اس فراوان کننگ کن گام گیج نا گرج آ زور شاغار۔ اوکان پد چناک بینکنگ سیکٹر نا بابت اسہ کیس اسے ٹی صدر مملکت نا کنڈآن کروک آ سماعت اٹی ہم بشخ ہلکر۔
