پاکستان نا سیرین ایئرلائن نا چین اکن جہاز آتا بناء

اسلام آباد۔ 19 نومبر (اے پی پی) پاکستان نا نجی فضائی کمپنی سیرین ایئرلائن چین اکن تینا جہاز آتا بناءِ کرینے۔ یک شنبے نادے آ جاری پریس ریلیز نا رداٹ جہاز کراچی آن براستہ اسلام آباد بیجنگ نا ڈاکسنگ بالی پٹ آ سرمس، ہراڑے پبی ءُ بیابخیری دود اسے نا بست وبند ءِ کننگا۔ دود آن تران کرسا وزیراعظم نا سلاہکار ہوابازی ایئرمارشل (ر) فرحت حسین خان دافلائٹ آپریشن نا بناءِ رابطہ، سفر و سیل و سوات نا کمک اٹ پاک۔چین تعلقداری تے مون آ دننگ اٹ اسہ مزل نا نشان اس گوندا۔ اوپارے کہ داڑآن ہڑتوم آ ملک آتا الس ءِ سفری آسراتی تا بے سلنگ آن فراوانی و ہڑتوم آملک آتا الس نا نیام اٹ سوگو تعلقداری ءِ مون آ دننگ کن پاکستان نا عزم انا درشانی مریک۔ داوخت آ چین اٹی پاکستان نا سفیر خلیل ہاشمی پارے کہ نجی بشخ انا کنڈآن ایئرلائن سروسز نا بناآن پاکستان و چین نا نیام اٹ زرکاری ، واپار، سفر و سیل وسوات ءِ ہم مون آ دننگک۔ خلیل ہاشمی مستی پارے کہ پوسکن آ روٹ ہڑتوم آ ملک آتا نیام اٹ کاروبار، سیل وسوات و دودوربیدہ ئی ہن و براٹی ودکی نا آسراتی فراوان کیک۔ اوپارے کہ اقتصادی تعلقداری تے سوگو کننگ آن بیدس فضائی رابطہ غاتیٹی ودکی نا مسخت سیل و سوات نا بشخ انا شونداری ٹی کڑد اداکننگ ہم ارے۔