کوئٹہ۔ 19 نومبر (اے پی پی) نگراں صوبائی وزیرحوالکاری بلوچستان جا ن اچکزئی پارینے کہ بلوچستان ہیلتھ کارڈ انا رداٹ مچ آ ملک اٹی 4 ہزار 537 بندغ آتا درمان ءِ کننگا وخت اس کہ 16 سد آن زیات مریض آتے داخل کننگانے، ہیلتھ کارڈ انا رداٹ امراض قلب، شعبہ زچگی ، جنرل سرجری، نیوروسرجری، کینسر و آرتھوپیڈک نا مریض آتا درمان ءِ کننگانے۔ جان اچکزئی پارینے کہ بلوچستان ہیلتھ کارڈ انا رداٹ 15 دے اٹی مچ آ ملک انا چندی ہسپتال آتیٹی 4 ہزار 537 ناجوڑ آتا درمان ءِ کننگا ہرافتے ٹی 1624 مریض آتے ہسپتال آتیٹی داخل کننگانے، داناجوڑ آتیا کل 6 کروڑ 66 لکھ 85 ہزار 745 روپئی خڑچ بسنے، ہیلتھ کارڈ انا رداٹ امراض قلب، زچگی ، جرنل سرجری، نیوروسرجری، کینسر و آرتھوپیڈک کون آ موذی مرض آتا درمان ءِ کننگانے ۔ مچ آ ملک انا چندی ضلع کوئٹہ مستونگ، کیچ، حب، رحیم یارخان، ڈیرہ غازی خان، راولپنڈی، لاہور، ملتان ، اوکاڑہ، بہاولپور ، سیالکوٹ، گجرات، خانیوال ، مظفر گڑھ، وہاڑی و ایلو ضلع غاتیٹی واقع ہسپتال آتیٹی بلوچستان ہیلتھ کارڈ انا رداٹ بلوچستان والا تا درمان ءِ کننگا۔ السی حلقہ غاک بلوچستان ہیلتھ کارڈ انا جاری کننگ نا رداٹ الس نا درمان نا ستاءِ کرسا خواست کرینے کہ ہیلتھ انا رجسٹریشن و ہسپتال اٹی داخلہ نا اندراج ءِ آسان جوڑ کرین تانکہ عام و سادہ مخلوق ہسپتال آتیٹی خوار مننگ آن بچنگ کے و اوفتا تکلیف آتا ازالہ ءِ کننگ مرے۔
