اسلام آباد۔ 19 نومبر (اے پی پی) چیئرمین سینیٹ محمد صادق سنجرانی سویلی کوریا نا دارالحکومت سیئول اٹی ایشیائی پولیٹیکل پارٹیز کانفرنس نا کنڈآن اڈ ہلوک انٹر نیشنل میڈیا فورم اٹی سینئر صحافی، کالم نگار و جاچکار حافظ طاہر خلیل ءِ امنائی وڑاٹ انٹرنیشنل میڈیا فورم نا شریک چیئرمین گچین مننگ آ مبارکبادی تسنے۔ یک شنبے نادے آ داڑے جاری بیان اٹی چیئرمین سینیٹ تینا تہنیتی کلہو اٹی سینئر صحافی حافظ طاہر خلیل نا صحافت نا بشخ و خاص کر پارلیمانی رپورٹنگ اٹ خذمت آتا ستاءِ کرے۔ اوپارے کہ حافظ طاہر خلیل تدوک آ کیہی دہائی آن پارلیمان نا رپورٹنگ اتون وابستہ ءِ، و او دا فرض ءِ جوانی اٹ سرتننگ ءِ، حافظ طاہر خلیل نا انٹرنیشنل میڈیا فورم نا چیئرمین گچین مننگ بے کچ ستاکڑزوک و صحافت نا بشخ اکن شرفمندی نا ہیت اسے۔ چیئرمین سینیٹ حافظ طاہر خلیل نا مستی سرسہبی و کامرانی تیکن نیک است خواہی نا درشانی ءِ ہم کرے۔ ڈپٹی چیئرمین سینیٹ مرزامحمد آفریدی ہم سینئر صحافی حافظ طاہر خلیل ءِ امنائی وڑاٹ انٹرنیشنل میڈیا فورم نا شریک چیئرمین گچین مننگ آ مبارکبادی تسنے۔
