نگراں کابینہ ملک ءِ زرگزرانی تنکی آن کشنگ نا لائخی تخک، انیق احمد

کراچی۔ 19 نومبر (اے پی پی) نگراں بنجائی وزیر مذہبی امور و بین المذاہب ہم آہنگی انیق احمد پارینے کہ نگراں بنجائی کابینہ ملک ءِ زرگزرانی تنکی آن کشنگ نا لائخی تخک، کابینہ ملک ءِ زرگزرانی وڑاٹ سوگو کننگ کن ہرممکن کوشست کننگ اٹی ءِ۔ داخیال آتا درشانی ءِ او کراچی بزنس فورم و تھنک ٹینک نا کنڈآن تدوک آ نن اسہ پروگرام اسے آن تران کرسا کرے۔ اوپارے کہ نگران بنجائی حکومت ملک اٹی درملکی زرکاری اتنگ کن کوشست کننگ ءِ، ویل آک زوت ایسر مریرہ۔ اوپارے کہ پوریاگر برادری ملکی زرگزران اٹ تمبہ نا حیثیت تخرہ۔ اواومیت ظاہر کرے کہ بروک آ دے تدوک آ دے تیان گچین مریک۔ بنجائی وزیر پارے کہ نگران بنجائی وزیر خزانہ ، نجکاری و ایلو وزیر آک ملک انا شونداری کن گچین کاریم کننگ اٹی ءُ۔ بنجائی وزیر انیق احمد پارے کہ داسال حج پیکج 11 لکھ 75 ہزار روپئی آن کم کرسا 10 لکھ 75 ہزار روپئی کننگانے، ملکی تاریخ اٹ اولیکووار حج پیکج نا زراٹی کمتی کننگانے۔ اوپارے کہ او حاجی تا ہوائی ٹکٹ آتیٹی کمتی کننگ کن ایئرلائن کمپنی تتون ہم گپ و تران کننگ ءِ۔ اوپارے کہ کم مروک آ زر ءِ حاجی تا اکاؤنٹ آتیا گدریفنگک۔ اوپارے کہ داسال کم و ود 90 ہزار حاجی حج آ کارہ و او غٹ ءِ انٹرنیٹ پیکج اتون سم مفت تننگک۔ اوپارے کہ اسہ ایپلی کیشن (ایب) اسے نا جاری کننگ تون حج ءِ ڈیجیٹلائز کننگانے۔ بنجائی وزیر پارے کہ اسلام آباد آن پد کراچی ءِ امیگریشن زون اس گوندنگانے و اومیت ءِ کہ لاہور ءِ ہم زوت گوندنگک۔ اوپارے کہ حکومت زالبول حجاڑی تے عبایا فراوان کیک ہرانا کاٹم نا تدوک آ بشخ آ پاکستانی بیرک مریک۔ داوخت آ پوریاگر برادری آن تعلق تخوک آ بندغ آک ہم تران کریر و وزیر آ زور شاغار کہ او کراچی نا ویل آتے ایسر کیر، ہرانا ایسری کن بنجائی وزیر کابینہ ٹی دننگ ناقول کرے۔