اسلام آباد۔ 19 نومبر (اے پی پی) اسپیکر قومی اسمبلی راجہ پرویز اشرف مچ آ دنیا ٹی تینا کسبی زمواری تیٹی شہید مروک آ صحافی تے خراج عقیدت پیش کرسا پارینے کہ صحافی تا جون و مال و اوفتا بنداوی حق انا رکھ ءِ پک کننگ ننا غٹ انا اسیجائی زمواری ءِ۔ صحافی تا جہانی دے انا وخت آ جاری کلہو اٹی راجہ پرویز اشرف پارے کہ ہرسال مچ آ دنیا ٹی سد آصحافی تینا کسبی زمواری تے پورو کرسا شہید مریرہ، جمہوری و انصاف پسند راج انا ٹہیفنگ کن صحافی برادری نا حق انا رکھ المی ءِ، فلسطین و کشمیر اٹی صحافی تیا کروک آ ظلم بے کچ مذمت نا قابل ءِ۔ اسپیکر پارے کہ اقوام متحدہ غزہ و بھارت اٹی صحافی تیا سرے عام مروک آ دہشت گردی نا نوٹس ءِ ہلے، پاکستان نا پارلیمان صحافی تا رکھ ءِ پک کننگ اٹ پبی کڑد ادا کرینے۔ راجہ پرویز اشرف پارے کہ پاکستان پیپلزپارٹی صحافی تے مون تروک ویل آتا برخلاف مدام توار بڑز کرینے، شہید گودی بینظیر بھٹو نا دور ءِ حکومت اٹ صحافی تیا خلوک مون آ کانود ءِ چٹفین، نن آجوئی صحافت و صحافی تے بے خوف و خلیس تینا صحافتی زمواری تے پورو کننگ کن سازگار چاگڑد اس تننگ آ یخین تخنہ، ملک اٹی جمہوریت نا بحالی و جمہوری ادارہ غاتا سوگوی کن صحافتی برادری نا جہد ستاکڑزک۔ اسپیکر قومی اسمبلی پارے کہ صحافی برادری نا رکھ ننا جہد نا اہم پلو ءِ، میڈیا نا آجوئی و صحافی تا حق انا رکھ اکن ہر فورم آ توار بڑز کرسا کینہ۔
