اسلام آباد۔ 18 نومبر (اے پی پی) صدر مملکت ڈاکٹر عارف علوی پارینے کہ ساڑی آ دور اٹی پوسکن آ علم و فن نا درگہ غاک ملنگانو، ہراڑآن چاہندار آتے شونداری و شونہالی نا پوسکن آ سفر نا بناءِ کننگ نا حوصلہ و گیشتر وارخواہی دُوبسنے، پوسکن آ تعلیم نا ذریعہ ءِ زوت کاریم اٹ اتنگ آن پاکستان اسہ دہائی ٹی دنیا نا کماشی ءِ کننگ نا قابل مریک۔ اوداہیت ءِ ہفتہ نادے آ داڑے جناح کنونشن سینٹر اٹی رفاہ انٹرنیشنل یونیورسٹی نا18 می کانووکیشن آن تران کرسا پارے۔ صدر مملکت تینا تران اٹی طالب علم آتیا علم حاصل کننگ و ملک انا خذمت ءِ کننگ کن غٹ پوسکن آ وسیلہ غاتے کاریم اٹ اتنگ آ زور شاغا۔ صدر ملک انا روشنا آخبت کن طالب علم آتیا تینے ساڑی آ دور انا خواست آتا رداٹ آراستہ کننگ آ زور شاغا۔ اویخین و پت انا درشانی ءِ کرے کہ پوسکن آ تعلیم نا ذریعہ ءِ زوت کاریم اٹ اتنگ آن پاکستان اسہ دہائی ٹی دنیا نا کماشی ءِ کننگ نا قابل مریک۔ صدر مملکت زند انا چندی بشخ آتیٹی پٹ وپول نا اہمیت ءِ تالان کرسا کشت وکشار اٹی ایسٹونیا و ہالینڈ کون آ چنکا مل آتا سرسہبی تا حوالہ ءِ تس۔ صدر پارے کہ ہالینڈ کچ انا لحاظ اٹ پاکستان آن 19 درسد چنک ءِ ولے کشاری بشخ اٹی شونداری نا سوب آن دنیا ٹی خورانا ارٹ میکو بھلا برآمد کنندہ ملک ءِ، تینا سرسہبی تا سوب آن دا چنکا ملک آتا نقش پا دنیا ٹی بھلن ءِ، پٹ وپول و گچین فیصلہ سازی شونداری نا دوئی کننگ کن بھاز اہمیت تخک۔ صدر مملکت یات کرفے کہ کوویڈ۔ 19 نا جہانی دین اٹی پاکستان ءِ دا مہلک ناجوڑی تون مون تننگ نا بابت دنیا نا 5 می گچین ملک گوندنگاسس ہرا مچ آ قوم انا اسیجا کمکاری و سیوت نا سوب آن ممکن مس۔
