پاکستان کن آسیان، نیامی ایشیاو افریقہ ٹی کاروبار ءِ مو ن آ دننگ نا پرکشش وارخواہی ساڑی ءِ، ایڈیشنل سیکرٹری وزارت خارجہ

اسلام آباد۔ 18 نومبر (اے پی پی) اسلام آباد چیمبر آف  کامرس اینڈ انڈسٹری نا صدر احسن ظفر بختاوری نا کماشی ٹی اسہ ڈل اس وزارت خارجہ نا ایڈیشنل سیکرٹری عمران احمد صدیقی تون اوڑدہی کرے و اوڑتون پاکستان نا واپار و برآمد آتے مون آ دننگ نا امور تیا گپ وتران کرے۔ ڈل آن تران کرسا وزارت خارجہ نا ایڈیشنل سیکرٹری عمران احمد صدیقی پارے کہ آسیان ، نیامی ایشیا و افریقہ ٹی پاکستان کن کاروبار ءِ مون آ دننگ نا پرکشش وارخواہی ساڑی ءِ ، ہرافتیان داسکان فائدہ ہرفنگ تنے ، ہنداسوب آن اوداہیت آ زور شاغا کہ بزنس کمیونٹی پاکستان نا واپار و برآمد آتے گچین کننگ کن دا ملک آتیا خاص چکار کے۔ اوپارے کہ پاکستان فارماسیوٹیکل آتون اوار چندی آب اٹ مصنوعات تیار کننگ ءِ، ہرادا ملک آتیٹی گچین مقبولیت دوئی کننگ کیک۔ اوپارے کہ بزنس کمیونٹی درملکی ہم منصب آتون جوائنٹ وینچر ز جوڑ کرسا پوسکن آ ٹیکنالوجی پاکستان اٹ اتنگ نا کوشست کے ہراڑان ننا ملک انا پیدواری لائخی ٹی ودکی مریک و زرگزران گچین مریک۔ اوباوری کرفے کہ وزارت خارجہ پاکستان کن پوسکن ءُ مارکیٹ پٹنگ نا کوشست آتیٹی نجی بشخ اتون ہرممکن کمک کیک۔ داوخت آ تا تینا خیال آتا درشانی ءِ کرسا اسلام آباد چیمبر آف کامرس اینڈ انڈسٹری نا صدر احسن ظفر بختاوری پارے کہ ٹریڈ ڈپلومیسی آ چکار کرسا پاکستان شونداری و شونہالی نا کنڈآ ہِننگ کیک۔ اوپارےکہ پیشن نا ملک آتیٹی تعینات پاکستان نا سفارت کار آتا نجی بشخ اتون خڑکی کمکاری پاکستان نا برآمد آتے مون آ دننگ اٹ اہم ءُ کڑد اس ادا کننگ کیک۔