مالے(مالدیپ) ۔ 18 نومبر (اے پی پی) نگراں بنجائی وزیر حوالکاری ، شینکاری و پارلیمانی امور مرتضیٰ سولنگی ہفتہ نادے آ داڑے جمہوریہ مالدیپ نا پوسکن گچین مروک آ صدر محمد معیزو تون اوڑدہی کرے۔ اوڑدہی ٹی پاکستان و مالدیپ نا نیام اٹ تعلقداری، زرگزرانی کمکاری، پاکستان اٹ مالدیپ نا سفیر نا تعیناتی تون اوار تین پہ تینی است خواہی نا اہم امور آ گپ وتران مس۔ نگران بنجائی وزیر حوالکاری وزیراعظم انوارالحق کاکڑ ، حکومت پاکستان و پاکستانی الس نا کنڈآن محمد معیزو ءِ صدر گچین مننگ آ مبارکبادی تس و اوڑکن نیک است خواہی نا درشانی ءِ کرے۔ اوڑدہی ٹی علاقائی کمکاری ءِ مون آ دننگ کن کاریم اٹ کننگ نا عزم انا درشانی ءِ کننگا۔ ہڑتوم آ ملک آتا نیام اٹ تین پہ تینی تعلقداری ءِ پین سوگو کننگ آ امنامس۔ نگران بنجائی وزیر حوالکاری صدر معیزو ءِ دورہ ءِ پاکستان نا سلہ خلک ہراڑآ او آمادگی نا درشانی ءِ کرے۔ داوخت آ مالدیپ نا صدر نگران بنجائی وزیر حوالکاری مرتضیٰ سولنگی نا حکومت پاکستان نا نمائندگی ءِ کننگ آ منت واری ءِ ہرفسا پارے کہ زوت پاکستان اٹ مالدیپ نا سفیر اس تعینات کینہ۔ اوپارے کہ پاکستان تون سفارتی تعلقداری تے پین سوگو کینہ۔
