اسلام آباد۔ 18 نومبر (اے پی پی) نگران بنجائی وزیر صنعت و پیدوار ڈاکٹر گوہر اعجاز پارینے کہ صنعتی مشاورتی کونسل نا جوڑ کننگ آن ملک اٹی پائیدار اقتصادی نمو و شونداری نا عمل ءِ ترند کننگ اٹ کمک رسینگک۔ ہفتہ نادے آ تینا اسہ بیان اسے ٹی اوپارے کہ ملک انا 13 بھلا گروپ آتیا تالان صنعتی مشاورتی کونسل نا جوڑ کننگ نا پڑو ءِ کرسا اودے خوشی ءِ۔ اوپارے کہ کونسل نا جوڑ کننگ آن اواری اٹ اسہ متحرک و فعال صنعتی پالیسی اسے نا جوڑ کننگ اٹ کمک رسینگک۔ داڑتون اوار اوار ملک اٹی اقتصادی نمو و شونداری نا عمل ءِ ہم ترند کننگ مریک۔ داکان بیدس بنجائی وزارت صنعت وپیدوار صنعتی مشاورتی کونسل نا جوڑ کننگ نا نوٹیفکیشن جاری کرینے۔ بنجائی وزیر صنعت و پیدوار کونسل نا چیئرمین و کنوینر مریک ۔ نوٹیفکیشن نا رداٹ کونسل اٹ نجی بشخ انا فواد احمد مختار ، محمد علی تابہ ، وقار احمد ملک، عبدالصمد داؤد ، رضامنشا، شہزاد اصغرعلی، سمیر چنائی، عامرفیاض شیخ، شہباز یاسین ملک، احسن بشیر، سید حیدر علی و فاروق نسیم ممبر مریرہ وخت اس کہ سرکاری بشخ آن ایڈیشنل سیکرٹری صنعت وپیدوار ، سیکرٹری خزانہ، سیکرٹری واپار، چیئرمین ایف بی آر ، ہر چارآ صوبہ و آزاد جموں وکشمیر و گلگت بلتستان نا چیف سیکرٹری و جوائنٹ سیکرٹری صنعت و پیدوار کونسل نا باسک آک مریرہ۔ کونسل نا دیوان ہر ہفتہ غا مریک و دا دہ ہفتہ غاتیٹی تینا رپورٹ ءِ پیش کیک۔
