لاہور۔ 18 نومبر (اے پی پی) پاکستان مسلم لیگ (ن) نا مرکزی سیکرٹری حوالکاری مریم اورنگزیب آشیانہ اقبال ریفرنس اٹی مسکوہی وزیراعظم محمد شہباز شریف نا بریت آ منت واری نا درشانی ءِ کرینے۔ ہفتہ نادے آ جاری اسہ بیان اسے ٹی اوشہباز شریف نا بریت آ مچ آ پاکستان، پارٹی سرکڑدہ و کارندہ غاتے مبارکبادی ترسا پارے کہ اللہ تاتعالیٰ نا شکر ءِ کہ او محمد شہباز شریف ءِ اسہ دروغ مقدمہ سے ٹی باعزت بری کرے۔ اوپارے کہ محمد شہباز شریف ءِ سیاسی انتقام نا خاطر دا دروغ انا مقدمہ ٹی اوار کننگاسس۔ اودے بے گناہ مننگ آن پد ہم زندان و عقوبت خانہ غاتیٹی بند تخنگا۔ اوپارے کہ ساف دیر مقدمہ ٹی عدالت آ بٹنگسا آشیانہ کیس اٹ اودے دزگیر کننگاسس، دروغ مقدمہ غاتیٹی بریت بے گناہ شہباز شریف نا صبر انا انعام ءِ۔ مریم اورنگزیب پارے کہ اینو الس ءِ سما تمنگ ءِ کہ ہراوڑ شہباز شریف ءِ دزگیر کننگ کن اوڑا دروغ انا مقدمہ جوڑ کننگا، دروغ انا مقدمہ جوڑ کرسا ملک و قوم انا وخت و پیسہ ءِ زیان کننگا۔ اوپارے کہ محمد شہباز شریف بطور وزیراعلیٰ پنجاب مچ آ صوبہ نا خذمت ءِ کرے و بطور وزیراعظم ملک ءِ ڈیفالٹ مننگ آن بچفے وخت اس کہ پاکستان و برطانیہ نا نیشنل کرائم ایجنسی تون اوار ہر عدالت آن شہبا ز شریف نا بے گناہی نا شاہدی بس۔
