کوئٹہ۔ 17 نومبر (اے پی پی)پاکستان پیپلزپارٹی کوئٹہ ڈویژن نا صدر خیرمحمد ترین پارینے کہ انصاف اٹ و شفاف گچین کاری ہی ملک ءِ ساڑی زرگزرانی و سیاسی تنکی آن پیشن کشنگ کیک پاکستان پیپلزپارٹی 8 فروری آ مروک آ لس گچین کاری تیٹی بشخ ہلسا پبی سرسہبی دوئی کیک، پارٹی نا یوم تاسیس نا وخت آ کوئٹہ ٹی مروک آ جلسہ ٹی پارٹی نا جیالہ غاک پبی بشخ ہلیرہ پارٹی نا مرکزی سرکڑدہ غاتا کوئٹہ غا سرمننگ آ اوفتے جم وجوش اٹ بخیرکننگک۔ داہیت ءِ او جمعہ نادے آ کوئٹہ ایئرپورٹ روڈ آ پاکستان پیپلزپارٹی کوئٹہ ڈویژن نا دفتراٹی یوم تاسیس نا جلسہ و 19 نومبر آ مروک آ پارٹی نا صوبائی و اونگز انا عہدیدار آتا دیوان نا تیاری تا بابت دیوان آن تران کرساپارے۔ اوپارے کہ پاکستان پیپلزپارٹی تینا جوڑ مننگ آن ہلیس اینو اسکان الس نا حق اکن جہد کرینے ہرانا پاداش اٹ پارٹی سرکڑدہ و جیالہ غاتے شہید کننگا و اوفتے زندان تیٹی بند کرسا اذیت تننگا ولے پارٹی سرکڑدہ غاک وخت اس ہم الس نا حق آ سودا بازی کتور۔ اوپارے کہ پاکستان پیپلزپارٹی نا سرکڑدہ غاک ہروڑنا ظلم و جور ءِ سگار ولے ملک ءِ ہلسا نریتور، ہراتم ہم ملک مشکل آتا گواچی مس تو پاکستان پیپلزپارٹی ملک ءِمشکل آتیان کشا و داسہ ہم ملک ءِ مشکل آتیان بیرہ پیپلزپارٹی ہی کشنگ کیک۔ اوپارے کہ پارٹی نا چیئرمین بلاول بھٹو زرداری پاکستان پیپلزپارٹی نا یوم تاسیس نا وخت آ مرکزی جلسہ کوئٹہ ٹی کننگ نا پڑو ءِکرسا بلوچستان نا کارندہ غاتا است ءِ کٹانے، 30 نومبر آکوئٹہ ٹی مروک آ جلسہ بلوچستان نا تاریخ نا غٹ آن بھلا جلسہ مریک۔ اوپارےکہ یوم تاسیس نا جلسہ نا تیاری تا بابت پاکستان پیپلزپارٹی نا صوبائی وونگز اناعہدیدار آتا اسیجائی دیوان کوئٹہ ڈویژن نا دفترایئرپورٹ روڈ آ اڈ ہلیک ہرانا غٹ تر تیاری تے پورو کننگانے ، دیوان آن پارٹی نا صوبائی صدر میر چنگیز جمالی، جنرل سیکرٹری روزی خان کاکڑ، سیکرٹری حوالکاری سردار سربندجوگیزئی و ایلو سرکڑدہ غاک تران کیرہ۔
