کوئٹہ۔ 17 نومبر (اے پی پی) سیکرٹری جا ن جوڑی بلوچستان عبداللہ خان پارینے کہ بلوچستان اٹی عمومی جان جوڑی نا گچینی کن ورٹیکل پروگرام تا افادیت کلیدی کڑد انا اہمیت تخک جان جوڑی نا بشخ اٹی برجا داپروگرام تے زیات آن زیات سودمند جوڑ کننگ کن متعین مسخت آتا دوئی کننگ اٹ بروک غٹ اڑاند آتے مر کننگک۔ داہیت ءِ او جمعہ نادے آ ایم سی ایچ پروگرام و نیوٹریشن پروگرام نا بابت تروک آ حوال نا وخت آپارے۔ داوخت آ ڈائریکٹر ٹیکنیکل ڈاکٹر امین خان مندوخیل، چیف پلاننگ آفیسر عبدالرسول زہری، صوبائی کوآرڈی نیٹر ایم سی ایچ پروگرام ڈاکٹر سمیع اللہ کاکڑ، صوبائی کوآرڈی نیٹر نیوٹریشن پروگرام ڈاکٹر نعیم زرکون، پروجیکٹ ڈائریکٹر بلوچستان ہیلتھ کیپٹل انوسٹمنٹ پروجیکٹ ثاقب کاکڑ، ڈویژنل ڈائریکٹر ڈاکٹر لبنی، پلاننگ آفیسر ڈاکٹر شاکو، کوآرڈی نیٹر نیوٹریشن پروگرام سلطان ترین و اسٹاف آفیسر سیکرٹری جان جوڑی میر شوکت بلوچ ئسک ساڑی ئسر۔ صوبائی کوآرڈی نیٹر ایم سی ایچ پروگرام ڈاکٹر سمیع اللہ کاکڑ و صوبائی کوآرڈی نیٹر نیوٹریشن پروگرام ڈاکٹر نعیم زرکون پروگرام نا بارواٹ حوال تسر۔ سیکرٹری عبداللہ خان پارے کہ ایم سی ایچ پروگرام و ایم این سی ایچ ، نیوٹریشن پروگرام محکمہ جا ن جوڑی نا اولیت آتیٹی اوار ءِ ، بلوچستان نا گیشتررقبہ غا تالان آبادی ءِ جان جوڑی نا آسراتی تا بہم فراوانی و ورٹیکل پروگرام تا ٹارگٹڈ پاپولیشن اسکان رسینگ اسہ مشکل ءُ عمل اس ضرور ارے ولے ناممکن اف۔ سیکرٹری جان جوڑی بلوچستان نیوٹریشن و ایم سی ایچ ورکرز پروگرام تا پروجیکٹ کوآرڈی نیٹر آتے پارت جاری کرے کہ او پروگرام ءِ پین گچین کننگ کن حکمت عملی اس تیارکیر۔ اونیوٹریشن و ایم سی ایچ ورکرزپروگرام تے پین فعال کننگ آ زور شاغاکہ ہرعلاقہ اسکان جان جوڑی نا بنداوی آسراتی تا فراوانی ٹی بروک اڑاند آتے مر مننگ کیر۔
