اسلام آباد۔ 16 نومبر (اے پی پی) پاکستان مقبوضہ غزہ ٹی اردن نا اسہ فیلڈ ہسپتال اسے نا گرد اسرائیلی کوزہ گیر فوج انا بمباری نا ترندی اٹ مذمت ءِ کرسا داہیت آ زور شاغانے کہ جہانی برادری غزہ ٹی کروک آ ظلم انا چٹفنگ و شاری تا زند و بنداوی پنجر نا رکھ اکن دمدستی جنگ بندی کن نیام تمے۔ اسرائیلی کوزہ گیر فوج انا بمباری ٹی اردنی عملہ نا ہفت بندغ ٹھپی مسنو۔ ترجمان دفترخارجہ نا کنڈآن جاری اسہ بیان اسے ٹی پاننگانے کہ دا غیرانسانی جلہو غزہ ٹی ہسپتال و طبی آسراتی تے شست کننگ نا چرجوئی نا تازہ انگا واقعہ ءِ و دا جنگی ڈوہ و جہانی کانود نا اسُل خلاف ورزی ءِ۔ ترجمان پارے کہ پاکستان دا وحشیانہ واقعہ و غزہ ٹی طبی آسراتی تایا ایلو جلہو آتا پورو جاست وپاست و مقبوضہ فلسطینی علاقہ غاتیٹی مروک آ جنگی ڈوہ اکن کوزہ گیر فوج ءِ جوابدہ کننگ نا خواست کیک۔
