لاہور۔ 17 نومبر (اے پی پی) نگران بنجائی وزیر تعلیم مددعلی سندھی پارینے کہ نگران بنجائی حکومت فنی تعلیم نا مون آ دننگ کن تینا پبی کڑد ءِ ادا کننگ اٹی ءِ، نن تینا غٹ تر لائخی تے السی راجی آسودہی کن بایدے کاریم اٹ اتین، ملک ءِ زرگزرانی وڑاٹ سوگو کننگ کن فنی تعلیم آن بیدس ننتون پین ہچ ءُ کسر اس سلتنے۔ او جمعہ نادے آ داڑے ورچوئل یونیورسٹی و نیشنل ووکیشنل اینڈ ٹیچنگ ٹریننگ کمیشن (نیوٹک) نا نیام اٹ مفاہمت نا یات داشت آ دستخط آتا دود آن تران کریکہ۔ داوخت آ ریکٹر ورچوئل یونیورسٹی آف پاکستان پروفیسر ڈاکٹر ارشد سلیم بھٹی و نیوٹک نا ایگزیکٹیو ڈائریکٹر محمد عامرجان شرفمند آ مہمان تا ساڑی گری ٹی مفاہمت نا یات داشت آدستخط کریر۔ دود اٹی وزارت تعلیم و انفارمیشن ٹیکنالوجی نا آفیسر آتون اوار ورچوئل یونیورسٹی و نیوٹک نا انتظامیہ بشخ ہلکر۔ نگران بنجائی وزیر تعلیم پارے کہ نگران بنجائی حکومت ملک اٹی فنی تعلیم نا مون آ دننگ کن تینا پبی کڑد ءِ ادا کننگ اٹی ءِ، نن خوانہ کہ نیوٹک و ورچوئل یونیورسٹی اواری اٹ فنی تعلیم نا دنگ ءِ ہر چنکا بھلا خلق آتسکان دے۔ اوپارے کہ الس داسہ تینا حق آن بلد مسنے و وخت انا خواست ءِ کہ نن تینا غٹ تر لائخی تے السی راجی آسودہی کن کاریم اٹ اتین۔ بنجائی وزیر پارے ک مستین اٹ نن بھاز انگا گڑاتا گوہانن ولے داسہ غلطی نا ہچ ءُ گنجائشت اس اف ، ننتون آزموندہ کننگ نا ہچ ءُ وخت اس اف، نن تینا نگران دور اٹی جوان انگا کاریم تا بنداو ءِ شاغسا کانہ تانکہ بروک آ حکومت کن آسانی مرے۔ اوپارے کہ سرکاری اسکول آتا آب ءِ پین گچین کننگ نا گرج ءِ، ہراچناک اسکول آتیان پیشن ءُ اوفتے پدی اتوئی مریک، داچرجوئی ٹی حکومت تون اوار اوار راج انا ہربندغ ءِ تینا کڑد ءِ اداکروئی مریک۔ بنجائی وزیر ورچوئل یونیورسٹی و نیوٹک ءِ مفاہمت نا یات داشت آ دستخط کننگ آ مبارکبادی تس و پارے کہ دا ہڑتوم آ ادارہ غاک فنی تعلیم نا مون آدننگ کن بھاز جوان کاریم کننگ ءُ، ورناتے پاکستان نا میرات کننگ داہڑتوم آ ادارہ غاتا مشن ءِ۔ نیوٹک نا ایگزیکٹیو ڈائریکٹر محمد عامر جان پارے کہ ورچوئل یونیورسٹی آن لائن فنی تعلیم ءِ لس کننگ اٹ نیوٹک نا کمک ءِ کیک۔ داوخت آ مہمان خاص مدد علی سندھی ءِ ورچوئل یونیورستی نا کنڈآن یات گاری شیلڈ اس پیش کننگا۔
