اسلام آباد۔ 17 نومبر (اے پی پی) نگران وزیراعظم انوارالحق کاکڑ پارینے کہ گوادر بندرگاہ آخبت خڑک اٹی سمندری کسر آن واپار نا اسہ بھلو مرکز اس مریک، حکومت گوادر بندرگاہ ٹی صنعت آتا جوڑ کننگ و صنعتی علاقہ غاتون مواصلاتی رابطہ غاتا گچینی کن گام گیج کننگ ءِ، گوادر نا ہندی مخلوق ءِ روزگار و جہانی آب انا آسراتی تا فراوانی گوادر بندرگاہ نا شونداری کن بھاز اہمیت تخک۔ جمعہ نادے آ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ تون گوادر شپنگ کلیئرنگ ایجنٹس ایسوسی ایشن نا ڈل داڑے اوڑدہی کرے۔ ڈل اٹی گوادر شپنگ کلیئرنگ ایجنٹس ایسوسی ایشن نا صدر عبدالرحیم ظفر، سیکرٹری جنرل حمید بلوچ و فیصل دشتی ئسک اوارئسر۔ اوڑدہی ٹی ڈل وزیراعظم ءِ درخواست کرے کہ گوادر بندرگاہ ءِ پورو فعال کننگ کن بنائی وڑاٹ سرکاری کارگو نا گڑاس بشخ گوادر بندرگاہ آن پاکستان درآمد کننگے۔ وزیراعظم تعلقدار کمامدارآتے دا بابت اسہ جوا ن ءُ رپورٹ اس پیش کننگ نا پارت کرے۔ وزیراعظم پارے کہ گوادر بندرگاہ آخبت خڑک اٹ سمندری کسر اٹ واپار نا مرکز مریک، حکومت گوادر بندرگاہ ٹی صنعت آتا جوڑ کننگ و صنعتی علاقہ غاتون مواصلاتی رابطہ غاتا گچینی کن گام گیج کننگ ءِ، گوادر ناہندی مخلوق ءِ روزگار و جہانی آب انا آسراتی تا فراوانی سی پیک نا دا اہم بندرگاہ نا شونداری کن بھاز اہمیت تخک۔ اوپارے کہ حکومت نا اولیت ءِ کہ گوادر اٹی فشریز نا صنعت ءِ جدت تننگے، گوادر اٹی ماہی گیر آتے پوسکن آ مشینری، کشتی تیٹی انجن و نیویگیشن ازباب و جہانی کہول آ رائج آب انا رداٹ مچھی ہلنگ نا وڑوڈول کن پیشہ ورانہ تربیت تننگ انگ ءِ، گوادر آن فشریز نا بشخ اٹی برآمد آتا گیشتر کچ آن پبی فائدہ ہرفنگک۔ ڈل وزیراعظم ءِ شپنگ کلیئرنگ ایجنٹس نا ویل آتا بابت ہم معلومدار کرے۔ وزیراعظم ڈل ءِ اونا ویل آتا اولیتی بنداو تیا ایسر کننگ ناباوری کرفے۔ ڈل وزیراعظم ءِ گوادر اٹی ماہی گیر آتا ویل آتا بابت ہم معلومدار کرے۔ ڈل حکومت نا ماہی گیر آتے روزگار نا فراوانی ، کسبی تربیت و گوادر نا جم وڑاٹ ویل آتا ایسری کن گام گیج آتا ستاءِ کرے۔
