اسلام آباد۔ 16 نومبر (اے پی پی) پاکستان بھارت نا غیرکانودی کوزہ ٹی جموں وکشمیر اٹی کوزہ گر کمامدارآتا کنڈآن منظم وڑاٹ کشمیری تے اوفتا ڈغارتیان بے دخل کننگ نا مذمت ءِ کرینے۔ دفترخارجہ نا ترجمان ممتاز زہرہ بلوچ پنچ شنبے نادے آ داڑے پریس حوال اٹی پارے کہ بھارت تینا غیرکانودی کوزہ ٹی جموں وکشمیر اٹی انسانی حق انا محافظ و سیاسی کارندہ غاتا جائیداد آتے سیل کننگ و ضبط کننگ نا مہم اٹی اختہ ءِ ۔ اوپارے کہ رواں ہفتہ بھارتی کمامدارآک اسہ وارولدا انسداد دہشت گردی نا کانود ءِ کاریم اٹ اتسا جموں وکشمیر نا ضلع پلوامہ ٹی کیہی جائیداد آتے ضبط کرے۔ ترجمان پارے کہ جائیداد آتیا کوزہ اختلاف رائے ءِ لتاڑنگ و انسانی حق انا محافظ آتے چھیڑفنگ نا اسہ ظالمانہ ذریعہ سے، دا طرز عمل و داوڑنا وحشیانہ بھارتی گام گیج آک بایدے چٹر۔ اوپارے کہ کشممیر نا ویل انا ایسری کن اقوام متحدہ نا سلامتی کونسل نا قرارداد آتیا عملدرآمد نا خاطر گام گیج کننگے۔ ترجمان پارے کہ پاکستان اقوام متحدہ ناسلامتی کونسل نا قرارداد آتا رداٹ کشمیر نا ویل انا انصاف اٹ و اپرامن ایسری کن تینا کشمیری ایلم و ایڑھ تا سیاسی، سفارتی و اخلاقی مخ تفی ءِ برجاتخک۔
