اسلام آباد۔ 15 نومبر (اے پی پی) صدر مملکت ڈاکٹر عارف علوی جنگ و جھیڑہ غاتے ٹی بے گناہ مخلوق نا کشت وخون ءِ توننگ و انسانیت ءِ دنیا نا واکدار آتا بیدادی آن بچفنگ کن اسہ متحد نقطہ نظر اس تینا کننگ نا گرج آ زور شاغسا پارینے کہ جہانی برادری غزہ ٹی خونریزی ءِ توننگ کن تینا پبی کڑد ءِ ادا کے۔ داخیال آتا درشانی ءِ او چارشنبے نادے آ داڑے اسلام آباد پالیسسی ریسرچ انسٹی ٹیوٹ(آئی پی آر آئی) نا کنڈآن سالانہ مارگلہ ڈائیلاگ 2023 آن تران کرسا کرے۔ دود اٹی درملکی سفارتکار و دانشور آتون اوار چندی ملک آتیان تعلق تخوک آ شخصیت آک بشخ ہلکر۔ صدر مملکت پارے کہ عقل نا طاقت ءِ دا متشدد واکدار آتیا فوقیت بایدے دوئی مرے ہرا انسانیت و انصاف نا روح ءِ چٹفرہ۔ صدر مملکت پارے کہ دنیا ٹی مفادات انسانیت غا غالب ءِ ہراڑے مخلوق ءِ غیر انسانی سلوک نا شست کننگ معمول جوڑ مسنے۔ اوپارے کہ جنگ اسہ ہم جھیڑہ سے نا ایسری اف۔ اوداہیت آ است ہسونی نا درشانی ءِ کرے کہ جنگ انا چٹفنگ نا برخلاف ویٹو نا حق ءِ کاریم اٹ اتنگ تعلقدار ملک آتا اخلاقی آب آتیا سوج انا نشان اس خلیک۔ صدر مملکت پارے کہ غزہ ٹی اسرائیل نا کنڈآن فلسطینی تا بھلو کچ اسے آ کشت وخون آ جہانی برادری نا دمدستی چکار نا گرج ءِ ، جہانی برادری ءِ مرے کہ او خونریزی ءِ توننگ کن تینا کڑد ءِ اداکے۔
