اسلام آباد۔ 15 نومبر (ا ے پی پی) نگران وزیراعظم انوارالحق کاکڑ پارینے کہ پاکستان ریلوائی نامین لائن ون (ایم ایل۔ون) ڈٹ سی پیک نا اسہ اہم ءُ بشخ اسے و حکومت دانا اولیتی بنداوتیا پوروی ءِ پک کیک، ڈٹ انا تفنگ اٹی چاگڑدی اثرآتا خاص خیال ءِ تخنگے، پاکستان اٹ ریلوائی نا بشخ اٹی پیشن نا زرکاری نا بھلو کچ اس ساڑی ءِ۔ وزیراعظم آفس نا میڈیا ونگ آن جاری بیان نا رداٹ نگران وزیراعظم انوارالحق کاکڑ نا کماشی ٹی مین لائن۔ ون (ایم ایل ون) ڈٹ آ جاچ دیوان چارشنبے نادے آ اسلام آباد اٹی مس ۔ دیوان اٹی نگران بنجائی وزیر شمشاد اختر، سمیع سعید، سلاہکار وزیراعظم احد خان چیمہ، خصوصی کمکار جہانزیب خان و تعلقدار بڑزکو کمامدارآک بشخ ہلکر۔ دیوان ءِ مین لائن ۔ون ڈٹ انا پوروی نا چندی ریسہ و تعمیری ہدف آتا بارواٹی معلومدار کننگا۔ دیوان ءِ پاننگاکہ ڈٹ انا بابت ڈٹ بندی گڈیکو ریسہ غاتیٹی ءِ وخت اس کہ بروک آ سال انا بناٹی ڈٹ انا بنداو ءِ تخنگک۔ دیوان ءِ مستی پاننگاکہ ڈٹ اِرا ریسہ غاتیٹی تفنگک ۔ اولیکو ریسہ ٹی کراچی آن ملتان 930 کلومیٹر ریلوائی لائن اس تالان کننگک، دا بشخ اٹی 2022 اٹی نوکاپ نا مون اٹ بروک آ ریلوائی انفراسٹرکچر ءِ ہم جہانی آب انا عین رداٹ جدت تننگک۔ ارٹ میکو ریسہ ٹی ملتان آن پشاور 796 کلومیٹر نا بشخ مریک۔ دیوان ءِ مستی معلومدار کننگا کہ ڈٹ ءِ دا طرز اٹ جوڑ کننگ انگ ءِ کہ آخبت اٹ ریلوائی ءِ گرج انا رداٹ پین جدت ہم تننگ مریک۔ وزیراعظم پارت کرے کہ ڈٹ انا ہدف آتے متعین کروک وخت اٹ پورو کننگے۔ وزیراعظم مستی پارت کرے کہ پاکستان ریلوائی ٹی اصلاحات آ جوان ڈٹ بندی کرسا زوت پیش کننگے تانکہ ایم ایل۔ ون ڈٹ انا بھرم تیان پورو فائدہ ہرفنگ مرے۔ اوپارے کہ مین لائن ون ڈٹ انا شروعات و ریلوائی نا اصلاحات نگران حکومت نا اولیت ءِ۔ مین لائن ون ڈٹ پاکستان اٹ مواصلاتی بنداوی پنجر نا شونداری ٹی خصوصی اہمیت تخک ۔ مین لائن۔ ون ڈٹ قومی نوعیت نا ہندن ءُ ڈٹ اسے ہرا ملک اٹی ٹرانسپورٹ بشخ اٹی انقلاب اس اتیک۔ اوپارت کرے کہ پاکستان ریلوائی ٹی اصلاحات اتسا اونا کچ آن پبی فائدہ ہرفنگے۔ مین لائن ون ڈٹ انا ہدف آتا متعین کروک وخت اٹی پوروی ءِ پک کننگے۔ ڈٹ انا تفنگ اٹ شفافیت نا خاص خیال ءِ تخنگے۔ وزیراعظم پارے کہ ڈٹ انا پوروی آن ملک اٹی پوسکن روزگار نا وارخواہی و گڑاتا فراوانی ناخڑچ بے کچ کم مریک۔ ڈٹ انا پوروی آن سفری خڑچ و درکار وخت اٹی کمتی مریک۔ ڈٹ انا پوروی آن پاکستان نا بندرگاہ تا نئے بیرہ ملک انا زرگزرانی ہند آتون مواصلاتی رابطہ گچین مریک بلکن سی پیک نا رداٹ ڈیہہ انا ایلو ملک آتیکن ٹرانزٹ روٹ انا مسخت ہم پورو مریک ۔
