دنیاکن ہچ ءُ پابندی اس اف، اوغانیک سہی دستاویز آتون پاکستان اٹ کاروبار کیر، نگراں وزیرداخلہ سرفراز احمد بگٹی

اسلام آباد۔ 14 نومبر(اے پی پی) نگراں وزیرداخلہ سرفراز احمد بگٹی پارینے کہ اوغانی تتون اوار جہانی برادری آ سہی دستاویز آتون پاکستان اٹ کاروبار کننگ آ ہچ ءُ پابندی اس اف۔ اسہ نجی ٹیلی ویژن چینل اسے تون گپ وتران کرسا اوپارے کہ پاکستانی شاریک ویزہ و سہی دستاویز آتیان بیدس کاروباری مسخت آتیکن اوغانستان اٹی پترینگ انگ کپسہ، ہر ملک اٹی پترینگ انگ کن قاعدہ وضابطہ اس مریک، اومستی پارے کہ پاکستان ہرشہریت تخوک آءِ جوان دستاویز آتون واپار وکاروبار نا بناءِ کننگ نا بخیر اٹ پاہک ۔ اوپارے کہ کانود نافذ کروک آ ادارہ غاتا کنڈآن بناکروک آ مہم آن پد اِرالکھ آن زیات اوغان باتی پاکستان ءِ اِلاسر۔ اوپارے کہ پاکستان ءِ تدوک آ کیہی سال آن دہشت گردی نا ویل مون تروک ءِ، اومستی پارے کہ نن دہشت گردی نا برخلاف جنگ اٹ ہزار آ جون تے ندر کرینن۔ او پارے کہ گڑاس اوغان مخلوق ہرا پاکستان اٹ غیرکانودی وڑاٹ رہینگارہ ڈوہدار سرجزآتیٹی اوار خننگاسر۔ امن ءِ پٹڑی آن دڑنگ اٹ را انا اوار مننگ نا بارواٹی اسہ سوج اسے نا ورندی ٹی اوپارے کہ را پاکستان اٹی پرامن چاگڑدءِ لتاڑنگ کن دہشت گرد ٹولی تا مالی کمکاری ءِ کننگ ءِ۔ اوپارے کہ سیم تیان بے چیٹی ءِ کنٹرول کننگ کن سخت گام گیج کننگانے۔ پاکستان تحریک انصاف (پی ٹی آئی) نا برخلاف کارروائی نا بابت اسہ سوج اسے نا ورندی ٹی اوپارے کہ ہرافک قومی ادارہ غاتا برخلاف ڈوہ انا مرتکب خننگار اوفتے تون کانود نا رداٹ سلوک کننگک۔ اوپارے کہ 9مئی آ پرغ و بٹ پاکستان اٹ اسہ است ہسون واقعہ اس ئس۔ اوخبڑدارکرے کہ اسٹ اسے ہم دا ملک انا سیکورٹی ادارہ غاتا برخلاف کاریم کننگ نا موکل تننگپک ۔