گدرینگوک آ منہ سال اٹی ذیابطیس(شوگر) نا مرض اٹی خوفناک حداسکان ودکی مس، اسپیکر قومی اسمبلی

اسلام آباد ۔ 14 نومبر (اے پی پی ) اسپیکر قومی اسمبلی راجہ پرویز اشرف پارینے کہ گدرینگوک آ منہ سال اٹی ذیابطیس(شوگر) نا مرض اٹی خوفناک حداسکان ودکی مسنے، داوخت آ مچ آ دنیا ٹی شوگرنا مریض آتا کچ اٹی ننا نمبر مسٹ میکو ءِ وخت اس کہ مڈل ایسٹ و افریقہ نا 21 ملک آتا لڑاٹ ننا نمبر ارٹ میکو ءِ۔ ذیابطیس آن بچنگ نا جہانی دے انا وخت آ اسپیکر قومی اسمبلی تینا کلہو اٹی پارے کہ پاکستان اٹ شوگر نا مریض آتا کچ 3 کروڑ 30 لکھ آن گدرینگانے ہرا کہ اسہ خطرناک ءُ ہیت اسے۔ اوپارے کہ دادے ءِ اڈتننگ نا بنداوی مسخت ذیابطیس (شوگر) نا بابت آگاہی ودی کننگ ءِ۔ اوفریڈرک بینٹنگ نا کنڈآن طب انا دنیا ٹی خذمت آتے خراج تحسین پیش کرسا پارے کہ انسولین نا ایجاد ذیابطیس نا مریض آتیکن نعمت اسے آن کم اف۔ اسپیکر قومی اسمبلی راجہ پرویز اشرف پارے کہ ذیابطیس نا مرض تینا پیچیدگی نا اعتبار اٹ ایلو مرض آتا مقابلہ ٹی زیات خطرناک تکنگک، پاکستان اٹی ہم ذیابطیس نا مرض ترند ی اٹ تالان مننگ ءِ۔ اوپارے کہ تینا ہڑدے ئی زنداٹی مثبت بدلی اتسا و خور اٹی احتیاط کرسا دا مرض آن بچنگ مریک۔