اسرائیل نا غزہ نا کودک شاری تیا جارحیت ءِ اسہ وڑاسے ٹی ہم منپنہ، اسپیکر قومی اسمبلی راجہ پرویز اشرف

اسلام آباد۔ 20 اکتوبر (اے پی پی) اسپیکر قومی اسمبلی راجہ پرویز اشرف پارینے کہ اسرائیل نا غزہ نا کودک فلسطینی شاری تیا جارحیت ءِ اسہ وڑاسے ٹی ہم منپنہ، جہانی برادری و اقوام متحدہ دمدستی جنگ بندی کن گچین گام گیج کیر۔ جمعہ نادے آ اسپیکر قومی اسمبلی راجہ پرویز اشرف اسلام آباد اٹی فلسطین نا سفارت خانہ نا دورہ ءِ کرے۔ داوخت آ او فلسطینی سفیر احمد جواد ربیع تون اوڑدہی کرے و مظلوم فلسطینی الس تون او پورو یکجہتی نا درشانی ءِ کرسا اسرائیلی بمباری آن بھلو کچ اسے آ شاری تا جانی نسخان آ ڈکھیائی و است ہسونی نا درشانی ءِ کرے و اسرائیلی جارحیت نا ترندی اٹ مذمت ءِ کرے۔ داوخت آ فلسطینی سفیر تون گپ وتران کرسا اوپارے کہ اسرائیل نا غیرکانودی و غیرانسانی جارحیت ءِ اسہ وڑاسے ٹی ہم منپنہ۔ پاکستانی الس نا است ہم فلسطینی  الس تون سرک، مچ آ پاکستانی قوم فلسطینی تا جانی نسخان آ افسردہ ءُ، مشکل نا داساہت اٹی فلسطینی الس نا ہمت، حوصلہ و جوزہ ءِ سلام پیش کیوہ۔ اوپارے کہ جہانی برادری و اقوام متحدہ دمدستی  جنگ بندی کن گچین گام گیج کیر۔ راجہ پرویز اشرف پارے کہ نن شہید ذوالفقار علی بھٹو و گودی بینظیر بھٹو نا وژن آ عمل کرسا فلسطینی الس تون سلوک اُن، پاکستان فلسطینی الس ناا ست خواہی تا رداٹ فلسطینی ویل انا ایسری ءِ خواہک۔ فلسطینی سفیر احمد جواد ربیع فلسطینی الس تون یکجہتی نا درشانی آ اسپیکر قومی اسمبلی نا منت واری ءِ ہرفسا فلسطینی الس کن اونا جوزہ و احساس آتا ستا ءِ کرے۔ داوخت آ اسپیکر راجہ پرویز اشرف سفارت خانہ ٹی تخوک آ ہڑزخواہی کتاب اٹی تینا تاثرآتے ہم نوشتہ کرے۔