نگران بنجائی وزیر قومی جان جوڑی نا چک شہزاد اٹی دینی مرض آتا ہسپتال ءِ فنکشنل مفننگ آ ترندی نا درشان

اسلام آباد۔ 20 اکتوبر (اے پی پی) نگران بنجائی وزیر قومی جان جوڑی ڈاکٹر ندیم جان چک شہزاد اٹی دینی مرض انا ہسپتال ءِ اِراسال آن فنکشنل مفننگ آ نوٹس و ترندی نا درشانی ءِ کرسا پارے کہ چک شہزاد اٹی دینی مرض انا ہسپتال 250 کٹ آ تالان ءِ، ایگزیکٹیو ڈائریکٹر قومی ادارہ جان جوڑی ڈاکٹر سلمان نا کماشی ٹی کمیٹی اس جوڑ کرینے، کمیٹی زوت سلاہ و سوج مرتب کرسا پیش کے۔ وزارت جان جوڑی نا ترجمان نا رداٹ ڈاکٹر ندیم جان چک شہزاد اٹی دینی مرض ہسپتال نا دورہ ءِ کرے۔ دورہ  نا مسخت ہسپتال اٹی ساڑی آسراتی و کارکڑد نا جاچ ءِ ہلنگ ئس۔ دورہ نا وخت آ ڈاکٹر ندیم جان پارے کہ چک شہزاد اٹی دینی مرض انا ہسپتال 250 کٹ آ تالان ءِ۔ اوپارے کہ ہسپتال ءِ پورو فعال کننگ  کن مسہ باسکی کمیٹی اس جوڑکرینے۔ ڈاکٹر سلمان ایگزیکٹیو ڈائریکٹر قومی ادارہ جان جوڑی کمیٹی نا کماشی ءِ کیک۔ کمیٹی ہسپتال ءِ پورو وڑاٹ فعال کننگ کن مربوط حکمت عملی اس جوڑ کیک۔ اوپارے کہ کمیٹی زوت سلاہ و سوج مرتب کرسا پیش کے۔ اوکان پد بنجائی وزیر جان جوڑی ڈاکٹر ندیم جان ریجنل بلڈ سینٹر ناہم دورہ ءِ کرے۔ ریجنل بلڈ سینٹر اٹ چِل آن زیات سٹاف غیرحاضر ئسر۔ وزیر جان جوڑی ڈاکٹر ندیم جان ساڑی آ حالیت آتیا نوٹس و سخت گڑتی نا درشانی ءِ کرے۔